Home > Otramiente > SUATEA presenta un informe sobre l’impactu de la LOMCE nes plantiyes de profesoráu.

SUATEA presenta un informe sobre l’impactu de la LOMCE nes plantiyes de profesoráu.

Tando acabante d’aprobase la LOMCE nel Senáu el nuestru sindicatu fae un estudiu inicial onde amuesa l’impactu que produciría la entrada en vigor de la nueva llei nes plantiyes del profesoráu.
La desapaición del calter públicu de la Educación, el baille d’asignatures col fortalecimientu d’unes y el debilitamientu d’otres, l’ausencia d’apoyos y atención a la diversidá xunto cola progresiva privatización fae prever que sobrarán munchos docentes en toles etapes educatives.Tola sociedá sufrirá les consecuencies d’esta llei, pero’l profesoráu verá hipotecáu’l so futuru llaboral y profesional. Hai que siguir lluchando y participando nes movilizaciones esixendo que la LOMCE nun entre en vigor. La desobediencia civil y la insumisión son les xeres que debemos desarrollar si llega a aplicase.

Estudiu sobre l’Impactu de la LOMCE nes plantiyes de profesoráu

Nestos meses, la comunidá educativa asturiana y la de tol estáu salimos a la cai pa refugar la LOMCE y los retayos, tanto los del gobiernu central como los del gobiernu asturianu.
Les manifestaciones, concentraciones y fuelgues masives amosaron otra vuelta’l refugu total a les polítiques privatizadores y segregadores del gobiernu Rajoy y del tándem Wert-Gomendio que pretenden la destrucción de la escuela pública y el despidu del so profesoráu, empezando pel colectivu interín.
Los retayos n’Asturies tamién se tán faciendo notar cola destrucción de cientos de puestos de trabayu, l’amenaza de la fusión de centros pa próximos cursos y l’empioramientu de les condiciones llaborales y d’escolarización del alumnáu.
SUATEA presenta un estudiu inicial sobre l’impactu de la LOMCE nes plantiyes docentes. Y eso ensin falar del proyectu d’Estatutu Docente que’l Ministeriu tien en mente pa poner al profesoráu baxo la bota de l’arbitrariedá y l’enchufismu, con un conteníu del qu’informaremos en conociendo’l borraor de la propuesta.
La LOMCE acaba d’aprobase nel Senáu y esti xueves 28 serálo nel Congresu, cola inclusión d’enmiendes qu’afonden na privatización. Trátase d’una llei que privatiza’l serviciu públicu, que segrega al alumnáu con itinerarios, vacía y anula les competencies educatives d’Asturies, elimina la xestión y participación democrátiques de los centros educativos, cuestiona la competencia profesional del profesoráu pa evaluar al so alumnáu cola imposición de reválides que constitúin estorbises pa los estudiantes, torga’l calter laicu de la educación, introduz l’arbitrariedá como criteriu pal accesu a la función pública y pa la conservación del puestu de trabayu, dexando al colectivu d’interinos na absoluta indefensión y afonda nos retayos n’educación. El sistema de conciertos vese reforciáu incluso pa los centros que segreguen al alumnáu por razones de sexu.
Estos efectos y otros tuvieron nel debate mediáticu, na denuncia y nes propuestes alternatives treslladaes poles distintes organizaciones venceyaes a la defensa de la escuela pública, poles organizaciones sindicales, sociales y polítiques.
SUATEA va siguir insistiendo nos elementos anantes espuestos y ensin perder una visión global quier apurrir delles consideraciones qu’aterricen nes consecuencies qu’esta Llei provocaría nes plantiyes docentes.
L’estudiu fechu permítenos concluyir que si nun se torna la entrada en vigor de la LOMCE sobrará profesoráu enforma en toles etapes educatives, delles aries prácticamente desapaecerán y el colectivu d’interinos será’l primeru al que despidan, que nengún docente tendrá’l derechu a conservar el so destín nun centru educativu y que llantar la LOMCE nun permitirá siquier l’asunción mínima del númberu actual de docentes funcionarios de carrera tan necesarios anguaño nel sistema educativu públicu.

La desapaición del calter públicu de la Educación afecta a tol profesoráu
1. La LOMCE fala del sistema educativu español n’abstracto. Permite espresamente que’l serviciu educativu lu regule, lu dea, lu financie cualisquier axente priváu. Amás, cuando definen al sistema educativu, nun apaez el calificativu de públicu.
2. Un principiu básicu de la LOMCE ye la llibertá de criación de centru docente (n’abstracto). Les ufiertes educatives puen ser feches tanto poles Alministraciones educatives como por estos centros docentes. Ye más, cualisquier centru educativu priváu qu’acredite tener alumnado abondu deberá ser subvencionáu con fondos públicos pola Alministración educativa. La duración del conciertu prevista na LOMCE reduz tovía más el calter públicu de la Educación, yá qu’aumenta en Primaria (6 años) y pal restu de niveles 4 años. Permítese la concertación en Bachilleratu y la FP Básica conciértase preferentemente. Consagra tamién conciertos que segreguen por sexos.
3. Como complementu del puntu 2., la LOMCE introduz la llibertá d’enseñanza como derechu de los padres y tutores llegales a elexir el tipu d’educación y el centru pa los sos fíos.
4. La LOMCE fala d’ufierta de places n’abstracto (ensin calificativos de públiques), en consonancia colos puntos anteriores. Ye más, respecto a puestos escolares de nueva criación nos niveles obligatorios de baldre afirma que tendránse en cuenta les ufiertes existentes nestos centros concertaos.
5. La LOMCE permite a los centros privaos solicitar suelu público pa la so construcción. En casu d’axudicación de suelu público, el centru priváu gociará al tiempu d’un conciertu.
6. La programación xeneral del enseñu correspuende al Gobiernu, pero non la prestación del serviciu (que podrá también ser fecha por cualisquier centru priváu, si tien demanda).
7. La LOMCE afirma que l’Estáu garantiza una plaza na educación obligatoria (sólo dende 1º de Primaria hasta 4º de la ESO). D’un llau nun garantiza y despréndese de la so responsabilidá en rellación col restu de niveles educativos (Educación infantil, Adultos, les Escueles d’Idiomes, d’Artes, Deportives, los Conservatorios de música). D’otru amás diz garantizar la plaza, esto ye, la so programación, pero non la prestación del serviciu. De lo anterior deduzse que, en casu d’aplicase la LOMCE, sobraría un númberu importante de profesoráu na rede pública, yá qu’estos centros dexaríen de ser públicos y el so profesoráu perdería los sos puestos de trabayu, como yá ta pasando n’otros países de la nuestra redolada. L’esmantelamientu de la educación pública y de baldre afectaría a tolos niveles de la educación obligatoria y la educación non obligatoria sería mayormente privatizada.

Otres consideraciones rellacionaes con tresllaos y movilidá de tol profesoráu
1. El director/a d’un centru educativu podrá conformar el so claustru, elixendo’l so profesoráu: la LOMCE regula y permite la especialización de los centros mediante la presentación d’un proyectu educativu. Los directores tienen autonomía pa la xestión de los recursos humanos, materiales y financieros. Esta movilidá afecta a tolos docentes d’un centru educativu o a aquellos que quixeren un destín concretu. Los requisitos y méritos pa los puestos de trabayu ufiertaos ponlos el director/a, que determina quién reúnen el perfil. Nel casu del profesoráu interín, el director/a podrá peñerar a los docentes ensin respetar les llistes d’empleu. El despidu de miles de interinos tará servíu.
2. La LOMCE nun derogó la disposición adicional séptima de la LOE:” tolos funcionarios pueden escepcionalmente desempeñar funciones nuna etapa, o nel so casu, enseñanza distintes de les asignaes al so cuerpu con calter xeneral…”. Esto provocaría trasvase forzosu de profesoráu d’un nivel educativu a otru y la obligación d’impartir una materia distinta a la que se tuviera impartiendo, como antoxana de los despidos igual que pasa nel vecín Portugal colos funcionarios de carrera.
3. La LOMCE fai un nuevu repartu de les distintes enseñances (fai de menos les enseñances artístiques, musicales, plástiques y visuales, cultura clásica…, mete la Relixón evaluable y la so alternativa, suprime Educación pa la Ciudadanía…) La LOMCE produciría un baille d’asignatures y de les sos cargues llectives, que provocaríen tresllaos forzosos y despidos nes plantiyes docentes.
4. La LOMCE contempla un nuevu aumentu de les ratios, hasta un 10%. Esto provocaría amás d’un amontonamientu del alumnáu y l’empioramientu de les condiciones pal llabor docente, la necesidá de menos profesoráu y otra vuelta l’amenaza de los despidos empezando pel profesoráu interín y siguiendo pel funcionariu.

Concreción de dalgunos elementos del impactu demoledor de la LOMCE nes plantiyes del profesoráu nos diferentes niveles de la educación pública.

Educación Infantil
1. La LOMCE nun menta en nengún momentu la etapa de 0 a 3 años. La LOE fala de la Educación Infantil como una etapa única de 0 a 6 años. Hai que recordar que’l Programa INFANCIA (de cooperación del MEC colos territorios) eliminóse. Los neños y neñes hasta los tres años NUN EXISTEN pal sistema educativu diseñáu na LOMCE.
2. La educación básica y obligatoria na LOMCE llega dende 1º de Primaria hasta 4º de la ESO y la FP Básica. La educación infantil de 3 a 6 años tien calter voluntariu. La LOE afirmaba que les Alministraciones públiques promoverán una medría progresiva de la ufierta de places públiques nel primer ciclu. La LOMCE non sólo lo considera una educación de calter voluntariu, sinón que fala en xeneral de places (ensin considerales públiques). La LOMCE desfáise d’esta responsabilidá. Abandona’l segundu ciclu de la educación infantil qu’ensin dulda dirá privatizándose adulces. La etapa infantil quedará acutada pa quien puea pagala. ¿Qué va pasar col profesoráu d’esta etapa educativa? La respuesta paez evidente.

Educación Primaria
1. La Educación artística pasa a ser un área optativa. Eliminen Educación pa la ciudadanía y ponen Relixón o Valores sociales y cívicos. La Llingua Asturiana solo cabe nel bloque d’asignatures de llibre configuración autonómica, quedando nel aire la continuidá de la so presencia curricular tal y como la conocemos anguaño.
Independientemente de la valoración sobre’l despreciu a determinaes áries, produzse un baille d’asignatures y de la so carga llectiva cola correspondiente incidencia na plantiya del profesoráu.
2. Nesta Etapa parafítense en que la ufierta educativa será fecha poles Alministraciones educatives o polos centros docentes. N’abstracto, ensin especificar el calter públicu. ¿Qué va pasar col profesoráu que sobre nesta etapa porque una parte de la ufierta se cubra per parte d’axentes privaos?
3. La LOMCE nun prevé planes específicos de meyora pal alumnáu, sinón que diz: “l’Alministración educativa podrá poner planes de meyora, si…”. Esto va suponer, dau l’afogamientu presupuestariu de les CCAA, que difícilmente podrán ponese planes de meyora específicos pal alumnáu. Amás, dexa en manes de los equipos educativos les midíes pertinentes a tomar.
4. El profesoráu que fai xera d’apoyu y refuerzu nos centros educativos tamién ta en peligru asina como’l profesoráu más directamente venceyáu cola atención a la diversidá educativa.

Educación Secundaria Obligatoria
Na ESO habrá una enorme movilidá forzosa del profesoráu asina como, ensin dulda, despidos, empezando pel profesoráu interín y siguiendo col funcionariu si esta Llei se pon en marcha.
Dase un baille d’asignatures, el fortalecimientu d’unes y el debilitamientu d’otres, la impartición de la mesma materia pa opciones estremaes, la casi esclusión d’unes asignatures y introducción o eliminación d’otres. ¿Qué profesores impartirán un nivel, una o otra(es) opciones? ¿Qué profesores nun podrán impartir la so materia?
1. La LOE planifica les materias abarcando d’entrada dende 1º de la ESO hasta 3º. La LOMCE estrema materies conxuntes pa 1º y 2º de la ESO, pero delles diferentes pa 3º.
2. Na LOE “Educación para la ciudadanía” ta prevista pa ún de los tres primeros cursos de la ESO. Na LOMCE desapaez esta materia. La LOMCE mete la Relixón o Valores éticos en cada cursu de la ESO (incluyíu en 4º).
3. Na LOE son materies obligatories Educación Plástica y Visual, Música y Tecnología. Na LOMCE son optatives. El profesoráu d’estes materies pue ser el más afectáu polos retayos y la reconversión.
4. En 3º de la ESO (con 13 o 14 años d’edá) una parte del alumnáu desviaráse a los llamaos programes de meyora del aprendimientu. Al restu obligaráselu a escoyer ente “matemátiques orientaes a les enseñances académiques” o “matemátiques orientaes a les enseñances aplicaes”, poniendo asina dos matemátiques estremaes.
5. En 4º de la ESO, hai dos víes distintes. Habrá’l cursu cola opción global d’“enseñances académiques” (pa siguir con Bachillerato) y el cursu cola opción global d’“enseñances aplicaes” (pa siguir con FP).
Delles materies son iguales n’entrambos cursos: Historia y Xeografía, Llingua Castellana y Lliteratura y 1ª Llingua Estranxera. Les matemátiques serán distintes, igual que la mayoría de les optatives.
Materies como Filosofía, Tecnoloxíes de la Información y la Comunicación, segunda Llingua Estranxera, Educación Plástica y Visual, Artes Escéniques y Danza, Cultura Clásica, Música, ente otres, dependen de la ufierta de los centros, esto ye, que podríen acabar desapaeciendo por criterios económicos, pues la LOMCE plantea sólo que habrá d’escoyese como mínimo una y como máximo cuatro ente toes eses materies. El llugar qu’ocupará la Llingua Asturiana, arrequexada nel bloque d’asignatures de llibre configuración autonómica ta por determinar, corriendo’l peligru de vese difuminada ente una marea d’optatives promocionaes con mayor interés. Cuando falamos d’ufiertes de centros, recordemos que puen ser públicos o privaos.
6.- La FP Básica, de la que falamos de secute y siendo parte de FP, provocará tamién tresllaos de profesoráu de la ESO en determinaes materies comunes con secundaria.

Formación Profesional Básica
1.- La Formación Profesional Básica ye una novedá na LOMCE. De magar 2º de la ESO o 3º (siempre anantes de 4º), aquellos alumnos que tengan 15 años o los cumplan nel añu natural, podrán ser desviaos a estos ciclos de 2 años de duración.
2.- Na FP Básica, que tien distintos bloques, impartiránse delles materies coincidentes coles materies de la ESO: Llingua Castellana, Llingua Estranxera, Matemátiques, Ciencies Sociales, ente otres.
Cursar la FP Básica y acabar el ciclu nun da derechu a tener el títulu de secundaria. Hai que recordar que la FP Básica será oxetu PREFERENTE de conciertos. Muncho alumnáu que nun ye a progresar en 2º o 3º de la ESO, tará condenáu a metese na FP Básica. Otra vuelta asistimos non solo a un baille d’asignatures y del profesoráu, yá qu’en materies coincidentes cola ESO nun se sabe’l profesoráu que la impartirá, siendo claro que va sobrar profesoráu dao qu’estos ciclos serán mayormente privatizaos.

Ciclos Formativos de Grau Medio y de Grau Superior
1.- La LOMCE nun concreta la distribución de módulos profesionales y materies instrumentales que conformarán el currículu de los distintos títulos de grau mediu y grau superior. Sicasí, sabemos qu’esta modificación, con toa seguranza implicará una movilidá forzosa del profesoráu qu’anguaño imparte estos ciclos.
2.- Tampoco concreta cómo va articulase la futura Formación Profesional Dual. Sicasí, sigún se saca de les informaciones facilitaes dende’l Ministerio al traviés de la Conferencia Sectorial d’Educación, sabemos que va dase una competencia deslleal per parte de les empreses que podrán pagar beques-salariu al alumnáu que curse los sos estudios nestes empreses col consecuente desvíu d’alumnáu de la enseñanza reglada. Lo pior ye qu’esi alumnáu nun tien garantizada la so continuidá hasta acabar los sos estudios yá que dependerá de la disponibilidá de la empresa.
3.- La LOMCE nun deroga la Llei Orgánica 5/2002, de les Cualificaciones y de la Formación Profesional. Esta llei, que tampoco foi derogada pola LOE nin nos ocho años de gobiernu del PSOE, ye enforma dañible pal profesoráu en xeneral y, especialmente, pal profesoráu de secundaria que, de fechu ta siendo desplazáu d’aquellos centros que se tán convirtiendo en Centros Integraos. La Llei de FP y Cualificaciones tien otres dos consecuencies negatives pal sistema educativu:
• Prevé la financiación pública de la Formación Profesional impartida en centros y empreses privaes (art. 11.3).
• Pon la llibre designación del director/a per parte de l’Alministración de los centros integraos, acabando cola poca democracia que quedaba nos centros educativos de FP (art. 11.5).
La LOMCE provocará una importante movilidá forzosa del profesoráu tanto nes especialidaes de FP como nes d’ESO y Bachilleratu.
La FP Dual, pesie a tar subvencionada con fondos públicos, nun garantiza que l’alumnáu finalice los sos estudios, pero sí qu’implica una importante mengua de les plantiyes docentes.
La Llei de les Cualificaciones y de la Formación Profesional supón una vía pa la privatización de la FP reglada.

Bachilleratos
1.– Xunten los bachilleratos d’Humanidaes y Ciencies Sociales nunu solu colo que conlleva en reducción d’horariu y polo tanto de profesoráu. A última hora metieron les matemátiques nel bloque de Ciencies Sociales lo qu’amuesa la improvisación y falta de seriedá a la d’ellaborar esta Llei.
2.- L’alumnáu que pue acceder al Bachillerato ye’l que cursó en 4º de la ESO l’itinerariu d’enseñances académiques y superó la reválida. Nun ye abondo aprobar toles materies del cursu. La introducción de los itinerarios en 4º de la ESO seguirá teniendo consecuencies nel profesoráu. D’un llau, namás un pequeñu númberu de docentes impartirá’l Bachilleratu. El númberu d’alumnos/es será menor. El Bachilleratu tará reserváu a un alumnáu “privilexáu” que foi a superar una carrera d’estorbises. El sistema educativo diseñáu na LOMCE nun pretende atayar les desigualdaes sociales, nun plantega programes y mecanismos compensadores d’eses desigualdaes. La mayoría de los que cursaben hasta agora’l Bachilleratu desviaránse al itinerariu d’enseñances aplicaes (pa siguir la vía de la FP) y un gran númberu a la FP Básica. Serán necesarios menos docentes en Bachillerato pa menos alumnáu. ¿Qué pasará colos docentes que nun quepan nos Bachilleratos?.
3.- Hai una modificación d’asignatures mui importante. Nes materies optatives apaecen 13 materies, ente les que l’alumnáu ha d’elegir polo menos 2 y como máximo 3 asignatures. Delles d’eses materies yeren obligatorias pa tol alumnáu que cursara Bachilleratu, como por exemplu Historia d’España y Filosofía. La Relixón ta incluyida ente eses 13 materies y na LOMCE diz que va regulase per parte de les Alministraciones educatives y la so ufierta dependerá de los centros. Muncho tememos que lo que se pretende ye favorecer a la Ilesia Católica y la Conferencia Episcopal poniendo en competencia la materia de Relixón cola que se garanticen notes altes frente a otres materies “fuertes” y que necesiten estudiu, de forma que la matrícula que güei ye prácticamente inexistente medre en desterciu de materies fundamentales na formación del alumnáu.
Hai que recordar otra vuelta que, amás, la posibilidá d’especialización de los centros provocará una modificación profunda de les asignatures que cada centro puea impartir y polo tanto perda de puestos de trabayu y despidos.
Tamién esti tipu d’especialización tendrá como consecuencia una modificación sustancial del réxime nel que se desenvolverá l’actividá docente: dependerá del director o directora la continuidá tanto d’una persona funcionaria como d’una interina. L’arbitrariedá y l’amiguismu sustituirán a criterios oxetivos nel accesu a los puestos de trabayu como yá ta empezando a pasar en determinaes comunidaes autónomes.
4.- Na introducción del estudiu yá amosamos la perda del calter públicu de la educación. En Bachilleratu, amás, permitiránse los conciertos educativos incluso pa los centros que segreguen al alumnáu en función del xéneru. Otra vuelta, como consecuencia lóxica de lo anterior, sobrará profesoráu.

Les Escueles Oficiales d’Idiomes y otres enseñances de réxime especial
1.- La LOMCE considera educación básica dende 1º de Primaria hasta 4º de la ESO. Plantega la vía de la privatización al traviés de conciertos de la educación infantil del 2º ciclu (de 3 a 6 años), del Bachilleratu, de la FP. Sobre too de la FP Básica. Les Enseñances de les EOIs, Conservatorios, Artístiques, Deportives, d’Adultos, queden na normativa nun “limbu” susceptible d’interpretaciones varies.
2.- Fala de la posibilidá de contratar espertos con dominiu en llingües estranxeres pa les distintes etapes. El profesoráu nun va ser quien elixa destinu nesti casu. Serán les Alministraciones educatives quien contraten a estos espertos (han de ser llicenciaos).
3.- El Gobiernu afitará les bases de la educación plurillingüe, abarcando dende’l segundu ciclo de la educación infantil hasta’l bachilleratu. Esto rellaciónalo la propia LOMCE colos espertos del puntu anterior.
4.- El Gobiernu regulará les equivalencies de los títulos de les Enseñances d’Idiomes colos idiomes y restu de títulos de les enseñances del conxuntu del sistema educativu, apurriendo certificaciones venceyaes al acabu de determinaes etapes educatives en virtú d’una supuesta alquisición de competencies per parte del alumnáu. Eso afectará directamente a la ufierta y demanda de les EOIs.
Otra vuelta, topámonos énte una situación qu’indica que –de forma evidente- sobrará tamién profesoráu nes Escueles d’Idiomes.
La continuidá del calter públicu de les enseñances de réxime especial ta en cuestión, yá que les Alministraciones educatives podrán poner procedimientos pa favorecer l’autonomía y facilitar la organización y xestión de los centros. Na LOMCE les menciones que se faen a los centros qu’imparten estes enseñances – Artístiques, Deportives, Conservatorios, EOI, Persones Adultes… refiérense siempre a la so programación, nunca a la prestación del serviciu.
Como conclusión provisional d’esti primer estudiu d’impacto SUATEA quier alertar al profesoráu de las pergraves consecuencies llaborales que la implantación de la LOMCE pue traer. Ye xera de tola sociedá pero al profesoráu va-y nello’l so futuru llaboral y profesional. Tenemos de siguir lluchando y participando en cuantes movilizaciones se programen pa siguir desixendo que la LOMCE nun entre en vigor y fortaleciendo les alternatives a la implantación d’esta Llei. La desobediencia civil y la insubmisión son la xera que deberemos desendolcar si llega a aplicase.

 

Descargar Informe en PDF

Esta entrada tamién se puede consultar en: Castellanu