SUATEA presenta recursu esixendo estabilidá pal profesoráu interín

Esta entrada está disponible en: Castellano (Castellanu)

El sindicatu SUATEA vien denunciando nos últimos años la situación xenerada col personal interino del  sector educativu, onde les tases d’interinidás’incremetaron hasta superar el 32% n’Asturies.

L’Alministración educativa del Principáu d’Asturies, dende va años, vien incumpliendo colo establecío nel Estatutu Básicu del Emplegáu Públicu, al usar la figura del funcionariu interín de manera fraudulenta, pos contrató a estos  funcionarios interinos para cubrir puestos que nun respuenden a la necesidá y l’urxencia, sinón a vacantes estructurales y permanentes. Tamién la Unión Europea llamó l’atención al gobiernu español en delles ocasiones, esistiendo inclusive rempuestes a cuestiones prejudiciales nel sentíu de que’l personal interino ta contratao en fraude de llei y de que tendría de ser considerao personal indefinío. L’Alcuerdu que regula n’Asturies la confección de llistes d’aspirantes a interinidá incumple, polo tanto, la xurisprudencia del Tribunal de Xusticia de la Unión Europea, pos trai la inestabilidá del colectivu al rebaremar llistes tres cada procesu selectivu y provocar rotación permanente al sustituyir a unos interinos por otros cada cursu escolar. Añadío a lo anterior, el 26 de setiembre pasáu espublizóse una sentencia del Tribunal Supremu que xenera xurisprudencia. Nella’l tribunal declara nulu’l cese d’interinos al considerar que l’usu abusivu de contratos de duración determinada constitúi un abusu. Amás reconoz el so derechu a caltenese nos sos puestos de trabayu mientres l’Alministración nun cumpla cola normativa vixente.

Por toes estes razones, SUATEA presentó un recursu alministrativu nel mes de xunu. Tres el silenciu de l’Alministración, nel día de güei presentóse un nuevu recursu demandando y esixendo l’apertura de negociación d’un nuevu Alcuerdu que garantice’l venceyu contractual estable o indefiníu del colectivu. En casu de que nun s’empecipie dicha negociación, esti recursu va ser el pasu previu a una demanda xudicial na que se va esixir que se cumpla cola xurisprudencia del Tribunal de Xusticia de la Unión Europea.

 

Uviéu, a 29  de payares de 2018

Print Friendly, PDF & Email

Esta entrada está disponible en: Castellano (Castellanu)