SUATEA presenta demanda xudicial esixendo la fixeza del profesoráu interín

Esta entrada está disponible en: Castellano (Castellanu)

SUATEA PRESENTA DEMANDA XUDICIAL ESIXENDO LA FIXEZA DEL PROFESORÁU INTERÍN

SUATEA vien denunciando nos últimos años la situación xenerada col profesoráu interín n’Asturies, onde les tases d’interinidá medraron hasta superar el 32%, una cifra escandalosa si tenemos en cuenta que L’Alministración educativa asturiana incumplió de forma permanente colo establecío nel EBEP, al contratar al personal interino de manera fraudulenta, pos ocuparon puestos que nun respuenden a la necesidá y l’urxencia sinón a vacantes estructurales y permanentes. L’ausencia o les escases convocatories de procesos selectivos a lo llargo los años supunxo que munches vacantes estructurales, que tendríen de tar ocupaes por funcionarios de carrera, tean cubiertes permanentemente por funcionarios interinos al nun tresformales l’Alministración en plantiya orgánica, dándose d’esti mou’l fraude na contratación temporal.

Esti fraude na contratación del personal interino, en mayor o menor midida, produzse en toles Comunidaes Autónomes y en tolos sectores de la función pública. El Tribunal de Xusticia de la Unión Europea llamó l’atención al Gobiernu español en delles ocasiones, esistiendo inclusive rempuestes a cuestiones prexudiciales nel sentíu de que’l personal interino ta contratao en fraude de llei. Ello ye que tán plantegaes nueves cuestiones prexudiciales al TJUE que se van conocer probablemente  enantes de que fine esti añu que puen suponer el tresformamientu del personal interino en fixu como sanción a les Alministraciones Públiques españoles por abusar de la contratación temporal pa cubrir puestos estables y estructurales.

Añadío a lo anterior, el 26 de setiembre de 2018  el Tribunal Supremu declaró nulu’l cese d’interinos al considerar que l’usu abusivu de contratos de duración determinada constitúi un abusu. Amás, reconoz el so derechu a caltenese nos sos puestos de trabayu mientres l’Alministración nun cumpla cola normativa vixente. Esta sentencia del Tribunal Supremu ye bien importante porque xenera xurisprudencia.

Esta situación d’abusu na contratación produzse de forma xeneral nel casu de los funcionarios interinos docentes non universitarios, pero n’Asturies amás vien agravada pol Alcuerdu que regula la confección de llistes d’aspirantes a interinidá, que supón la rebaremación de llistes tres cada procesu selectivu ya implica rotación nel empléu porque trai en munchos casos la perda de puestos na llista ya inclusive la perda del empléu. Poro, l’Alcuerdu d’interinidá d’Asturies ye n’esencia contrariu a derechu al nun promover la estabilidá, lo que va en contra de la doctrina del Tribunal de Xusticia de la Unión Europea n’aplicación de la Directiva 1999/70 CE, ya inclusive en contra de la doctrina de la Sala de lo Contencioso-Alministrativo del Tribunal Supremu del 26 de setiembre de 2018.

Por toes estes razones, SUATEA, ante’l silenciu de l’Alministración a los recursos presentaos por esta organización sindical, presentó demanda ante los tribunales, onde se solicita que se reconoza de forma xeneral el calter estable permanente, fixu o indefiníu de los funcionarios interinos docentes non universitarios que lleven más de trés años encadenando contratos en situación de continuidá abusiva. Amás, solicítase que se reconoza’l derechu al abonu de retribuciones dexaes de percibir y tolos derechos alministrativos a que fuere menester de resultes de los ceses que supunxeren perda d’empléu por un tiempu determináu.

Print Friendly, PDF & Email

Esta entrada está disponible en: Castellano (Castellanu)