SUATEA pidi una reflexón a la Conseyería sobre los nocivos efectos de les sos práctiques

El sindicatu educativu SUATEA píde-y a la Conseyería d’Educación y a los sos responsables que faigan una evaluación seria, responsable y crítica de les sos actuaciones y práctiques a lo llargo d’esti mandatu qu’agora acaba.

Tamos asistiendo a un procesu d’oposiciones onde too paez ser frutu de la improvisación y la incompetencia de los máximos responsables de la Conseyería, qu’en dellos casos tuvieron que rectificar decisiones pol caos xeneráu y en dellos otros siguen aneciando coles sos práctiques que llevamos años sofriendo tanto nel planu sindical como nel llaboral.

Partimos d’una convocatoria d’oposiciones con una ufierta pública d’emplegu insuficiente p’atender a les necesidaes de los centros educativos y cumplir colos principios d’equidá, inclusión, coeducación, y atención a la diversidá dientro del sistema educativu públicu.

Esta convocatoria d’oposiciones yera un procesu viciáu de mano pola presencia del Alcuerdu d’Interinos firmáu ente l’alministración y los sindicatos ANPE y FETE-UGT que se ta demostrando, tal y como anticipó y denunció SUATEA, una trampa a tolos opositores.

Esti Alcuerdu d’Interinos tien como principal finalidá abortar les posibilidaes d’ampliar perfiles profesionales de los docentes al obligar a presentase na especialidá na que se tea en llista ensin permitir prebar n’especialidaes distintes. Si esto ye grave, más lo ye la presencia de tribunales masificaos con más de 200 integrantes como ye’l casu de la Especialidá d’Infantil, imponiendo un corte nel pasu a la segunda fase nun númberu llimitáu de persones por tribunal ensin atender a les capacidaes de méritu y igualdá, d’ehí la presencia de numberosos casos de docentes interinos con notes ente’l 4’5 y el 4’9, que ye la forma que buscaron dellos tribunales pa dexar constancia y manifestar qu’eses notes sedríen aprebaos en condiciones más xustes.

L’alcuerdu d’Interinos excluye de les llistes a toos aquellos que nun teniendo la especialidá nun algamen el 5 na primer fase de la oposición, siendo una suma importante de casos los que s’alcuentren nesta causística tal y como se ve nel eleváu númberu de consultes que se tán recibiendo na sede en relación a ello. Al mesmu tiempu corta la posibilidá d’ascesu a la función pública a los docentes qu’ensin experiencia y nun llegando a esi requisitu mínimu quieran dir entrando poco a poco nel sistema, condenándolos al desiertu llaboral.

Al mesmu tiempu hai numberoses crítiques a como se ta desenvolviendo tol procesu, con situaciones como la non actualización vía web de les convocatories de llamamientos pa lleer, obligando a los participantes a crear redes de collaboración ente ellos pa evitar tener que facer una visita presencial a les sedes de los tribunales pa conocer cuando yeren llamaos. Situaciones esperpéntiques como la propiciada pola alministración nos tribunales recomendando a los integrantes de los tribunales capturar los exámenes durante la llectura d’estos colos sos propios dispositivos móviles, lo que ye un atentáu a la privacidá de los participantes, y recomendación qu’hebo que rectificar.

O lo que ta socediento estos últimos díes col llamamientu pa la entrega de les Programaciones Docentes que tampoco se publica na páxina d’educastur y obliga a les persones que superen la primera fase de tener qu’acudir a les sedes pa confirmar los horarios d’entrega, too ello con menos de 24 hores de marxe, y ensin permitir les reclamaciones hasta qu’acabe’l procesu, xenerando una clara indefensión nos opositores.

Tampoco se sabe, a fecha d’hoi, les places que-y corresponden a cada tribunal, cuando ye dalgo que debería ser público y accesible. Sicasí tamos avezaos al escurantismu por parte de l’alministración que sigue negándose a facilitar y esponer los criterios d’evaluación de los temes, de los supuestos o de la parte práctica. Obligando a los concurrentes a examinase ensin conocer en base a qué criterios van ser calificaos.

Nun solo son les oposiciones, la Conseyería d’Educación sigui cola so estratexa d’echar pela boca de la Llei Wert, pero puertes a dientro aplicala y executala con frialdá y ensin facer usu de les midíes al so alcance pa mitigar les funestes consecuencies que va tener pal sistema educativu públicu asturianu. Mientres en comunidaes gobernaes pol PSOE, o que cuenten col so apoyu, ta texéndose una rede encontra de l’aplicación de la llei d’educación, n’Asturies tal paez que quieran ser los alumnos aventayaos del ex-ministru d’educación.

Los centros educativos de secundaria tán inmersos nun procesu de matriculación nos que siguen ensin tar claros los nuevos itinerarios educativos, y teniendo que facer frente a unos currícula aprebaos a pocos díes d’acabar l’actual cursu escolar pa una llei que tien tola traza de nun-y quedar más qu’unos meses de vida.

Y por si fuera poco, llega IU de la mano de Gaspar Llamazares pa firmar un alcuerdu d’investidura col actual gobiernu de la FSA-PSOE nel que la educación nun figura como exa central, avalando con ello les práctiques privatizadores de los últimos años del gobiernu de Javier Fernández y Ana González, ensin contraponer nenguna midía d’aplicación inmediata pa salvaguardar el sistema educativu públicu asturianu.

Nun contentos con too esto, la Conseyería publica un calandariu d’adxudicaciones d’interinos col qu’asemeya querer reíse del colectivu d’interinos. A resultes de los plazos qu’apaecen nesi calandariu el colectivu d’interinos a los que se-yos adxudiquen plaza van tener qu’incorporase a los centros educativos al día siguiente de l’adxudicación con tolo qu’ello conlleva en cuando a la conciliación familiar y la planificación de la vida personal de les persones. Hai tiempu más que de sobra a lo llargo de tol branu pa nun tener qu’esperar al 31 d’agosto pa saber onde te vas tener qu’incorporar a trabayar el 1 de setiembre.

Tampoco l’alministración tien traza d’iguar la situación d’indefensión na que queda l’alumnau de Secundaria y Bachilleratu, a los que se-yos sigue minguneando y negando la evaluación de setiembre en condiciones de xusticia y equidá por parte de los mesmos docentes que-yos impartió clase durante’l cursu académicu.