Home > Comunicaos > SUATEA pide una moratoria na renovación de conciertos

SUATEA pide una moratoria na renovación de conciertos

conciertos_250x177Mañana xueves día 16 de febreru, el Conseyu Escolar del Principáu d’Asturies emitirá un dictame sobre la porpuesta de resolución enviada pola Conseyería de Cultura y Deporte na que s’establez el procedimentu pol que se rexirá la soscripción por primera vez al réxime de conciertos educativos  de los  centros docentes privaos, asina como la so prórroga nel casu de yá tar concertaos.

SUATEA presentará una enmienda a la totalidá del informe pidiendo la retirada de la propuesta de resolución sobre conciertos educativos y l’establecimientu d’una moratoria hasta que s’algame un mínimu d’estabilidá llegal y reglamentaria, igual que se fexo na Comunidá autónoma de Navarra.

Xustifica la nuestra posición, el fechu de qu’angaño, nel Parlamentu, una Socomisión d’Educación na que participen distintos grupos parlamentarios empecipia’l procesu de negociación d’un “Pactu Educativu” qu’afectaría directamente a l’aplicación y desenvolvimientu de la LOMCE o inclusive a la derogación de la mesma. Frutu d’esti procesu pue haber cambeos sustanciales lexislativos y posteriormente reglamentarios qu’afectaríen directamente a les condiciones y requisitos de los conciertos educativos, incluyíu’l periodu de duración de los mesmos que foi aumentáu a 6 años na LOMCE.

Recordamos qu’a lo llargo d’estos últimos años, especialmente depués de la entrada en vigor del recretu 14/2012 de racionalización del gastu y la so aplicación al ámbitu educativu, na enseñanza pública vienen reduciéndose sistemáticamente aules añu a añu, mientres la enseñanza privada sigue recibiendo sovenciones ensin sufrir nengún tipu de recorte. El desaniciu d’aules públiques céntrase nes d’Educación Infantil, lo que xenerará col so efectu dominó la desapaición nel futuru d’aules de Primaria y Secundaria.

Siendo la Escuela Pública la única que presta los sos servicios en tolos territorios, que garantiza la igualdá d’oportunidaes y  que corrixe les desigualdaes sociales, ye menester defendela estableciendo los mecanismos que garanticen el so futuru cola toma de decisiones que nun lu hipotequen.  Pa nosotros dalgunes d’elles sedríen les siguientes:

  • Caltener el calter prioritariu de la Escuela Pública y el sosidiaru de la iniciativa privada.
  • Progresiva eliminación de los conciertos ellí onde la pública tenga abondes places.
  • Calatener abiertes toles aules de tolos niveleses educativos de les Escueles Públiques.
  • Recuperar les unidaes zarraes nos centros públicos ufiertando places a tol alumnáu que les solicite mermando les ratios máximes si fuere necesario.
  • Nun zarrar nenguna aula pública naquellos conceyos onde se caltenga la financiación de aules de centros privaos.
  • Ufiertar toles places que puedan asumir les infraestructures de los centros públicos.
  • Aplicar el principiu constitucional, recoyíu tamién na Declaración Universal de los Derechos Humanos, de non discriminación por razón de sexu, y en consecuencia rescindir los conciertos a los centros que tiene aules separtaes por sexu.

El Secretariáu de SUATEA

Uviéu 15 de febreru de 2016

Esta entrada tamién se puede consultar en: Castellanu