Home > Comunicaos > SUATEA pide que nos presupuestos s’inscriban midíes qu’ameyoren el Sistema Educativu

SUATEA pide que nos presupuestos s’inscriban midíes qu’ameyoren el Sistema Educativu

SUATEA pide que los próximos presupuestos sían el marcu nel que s’inscriban midíes qu’ameyoren el Sistema Educativu

El Conseyu de Ministros aprobó’l Proyectu de Presupuestos Xenerales del Estáu de 2015. De primeres plantégase que les tases de reposición del personal empleáu públicu van siguir conxelaes pa los funcionarios xenerales el próximu añu, como vieno asocediendo en tola  llexislatura. Pal personal de los servicios públicos denominaos esenciales, ente ellos educación, va alzar del actual 10% al 50% (el día anterior, anunciárase que xubiría al 20%).

Amás confirmóse que nel so cuartu añu de llexislatura’l gobiernu del PP va caltener la conxelación salarial del personal empleáu públicu, que se suma al retayu de más del 5%, a les xubíes del IRPF y a la conxelación del 2011 decretaes pol gobiernu del PSOE.

Sobre la devolución de la paga estra d’avientu de 2012, retirada pol so propiu gobiernu, anuncia que van devolver en 2015 una cuarta parte pal personal de l’Alministración Xeneral del Estáu, esto ye, los 44 díes yá devengaos de dicha paga estraordinaria, enantes d’aprobase’l decretazu de xunetu de 2012, pol que se procedió a suprimila. Nesti sentíu’l gobiernu asturianu tendría d’abonar darréu la parte proporcional d’esa paga- los 44 díes-, yá qu’hai delles  sentencies xudiciales nesti sentíu, incluyendo delles de SUATEA. Ye incomprensible qu’una parte del profesoráu cobrara y la mayoría tenga qu’esperar. Esiximos el so abonu na próxima nómina d’ochobre.

Los retayos y conxelaciones de los salarios de los y les trabayadores de los servicios públicos provocaron nestos últimos seis años la perda d’un 25 % del nuesu poder alquisitivu. Reclamamos por ello de primeres la devolución íntegra de la paga estra de 2012 y la fin de les conxelaciones salariales pa los y les trabayadores públicos.

Asina mesmo denunciamos que les Alministraciones estatal y autonómica utilicen la sida de la crisis económica pa conxelar, a güelpe de boletín oficial, la Ufierta d’Empléu Públicu del conxuntu de les Alministraciones Públiques y llendar intensamente la Docente y Sanitaria. Consideramos qu’estes midíes gubernamentales nun provocaron otra cosa qu’endelgazar y debilitar los servicios públicos básicos. El retrocesu nes condiciones llaborales del profesoráu ye cada vez mayor.

Na enseñanza, la resultancia d’estes polítiques d’empléu públicu que denunciamos rozó’l camín pa los retayos nes plantiyes. Amás, xubieron alarmantemente los porcentaxes d’interinidá cola consiguiente inestabilidá y precariedá nel empléu (na nuesa Comunidá cerca del 25%). Retayos de docentes, temporalidá y plantiyes inestables, un cóctel qu’aniquila la tan cacarexada calidá de la enseñanza.

Reclamamos en consecuencia al Gobiernu del Estáu que retire de la Llei de PXE de 2015 les mordaces a la Ufierta d’Empléu Públicu y que s’aprueben ufiertes y se saquen oposiciones col 100% de la tasa de reposición pal personal docente. N’Asturies lleven conxelaes les oposiciones de Primaria cuatro años, y cinco les de la inmensa mayoría de les especialidaes de Secundaria. Ye imprescindible que se faga yá una ufierta d’empléu arrogante que dexe acabar coles peraltes tases d’interinidá, con tiempu abondu, tresparencia y criterios oxetivos pa nun repitir los erros d’esti cursu.

D’otru llau, el gobiernu asturianu sigue aplicando disciplinadamente’l decretu 20/2012 qu’aumenta la carga horaria y el númberu d’alumnáu per aula, lo que ta llevando al profesoráu a una situación insostenible. Ye imprescindible que la Conseyería d’Educación amenorgue la carga horaria docente y el númberu d’alumnos y alumnes por aula. La llei permítelo, pero la Conseyería hasta agora fóxose la sorda a la mengua d’horariu, por casu, pal profesoráu mayor de 55 años. Ye una posibilidá real contemplada na llei y qu’apurriría pa cientos de docentes cercanos a la fin de la so vida llaboral una meyora inmediata de les sos condiciones de trabayu. Si la conseyería nun l’aplica ye porque nun quier. Porque desprecia al profesoráu y nun tien en cuenta les enfermedaes profesionales y el cansanciu que lu afecten sobremanera. Porque primen intereses economicistes sobre la pretendida defensa del sistema públicu.

En resume, el Gobiernu estatal tien qu’acabar colos retayos, devolver la paga estra de 2012, acabar cola conxelación salarial y ampliar la tasa de reposición al 100%. Pero’l Gobiernu asturianu tamién tien que dexar de mirar pa otru llau, pagar la parte correspondiente a los 44 díes (25% de la paga detraída), enllantar midíes p’ameyorar les condiciones de los docentes asturianos – como amenorgar les hores de docencia directa dotando de más profesoráu a los centros y empezando pol amenorgamientu a mayores de 55 años-, menguar el númberu d’alumnos /es por aula, y convocar oposiciones con toles garantíes. Los próximos presupuestos tendríen de ser el marcu nel qu’empezaren a ensertase estes midíes.

Uviéu, 30 de setiembre de 2014

VER EN PDF: 140930 Comunicáu Presupuestos

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339