SUATEA pide’l caltenimientu en llistes de quien nun pudo facer la oposición

Dende qu’entamó’l procesu d’oposiciones nel que ta enllamargada la Conseyería d’Educación, tán amontonándose una riestra d’incidencies graves con consecuencies mui dures pal profesoráu interín afectáu.

Por delles causes, cuando por errores nel pagu de les tases, cuando polos accidentes qu’atasquen l’autopista, por averíes nos medios de tresporte públicos como los ocurríos en RENFE o anulaciones de vuelos dende otres CCAA, el casu ye qu’hai un grupu curiosu de persones que nun pudieron presentase al llamamientu d’aniciu de la oposición o aportaron tarde.

La Conseyería ta inhibiéndose de toes estes incidencies que, pa crear más confusión y hasta desigualdá ente los opositores, tán resolviéndose de manera diferente según el casu. En dellos de tribunales esperaron y permitieron facer les pruebes; n’otros nun dexaron a la xente entrar pero emitieron un xustificante de la presencia de los interesaos nel centru; n’otros negáronse a apurrir xustificante…

Cuidamos que nun se pue permitir esta situación qu’amuesa otra vez que la organización de les oposiciones docentes nun acaba de perfacese ensin qu’heba siempre motivos pa que los medios de comunicación recueyan situaciones como éstes, mui dures en dalgún casu, con mayor sensibilidá que la que tien la propia Alministración.

Estes casuístiques, que dexen fuera de las llistes a los aspirantes implicaos ya incluso suponen en munchos casos el despidu efectivu, empobinando al paru a los que taben trabayando hasta agora, precisen una solución darréu.

Los efectos que tán pasando los afectaos son consecuencia d’un Alcuerdu d’Interinidá restrictivu y que dexa desamparáu a tol profesoráu que se ve nestes circunstancies. Por ello tien que se facer una modificación inmediata d’esti Alcuerdu y que se permita que les persones implicaes podian en cualquier casu quedar nes llistes nes que figuraben.

Uviéu, 22 de xunu de 2016