SUATEA pide a los partíos un compromisu cola Pública

Esta entrada está disponible en: Castellano (Castellanu)

Vicente Álvarez Areces en Canal10 Xixón:“… Asturias no modificó y mantuvo las ratios y cuando en un Sistema Educativo…¿no se habla de eficiencia en la gestión pública? Si tú no tienes demanda de niños en un nivel voluntario, porque no es escolarización obligatoria, el 0-3 y 3-6 es voluntario y si no hay niños que demanden ¿qué quieres terner aulas para seguir gastando?”

Nel debate a tres ente Xuníos Podemos, PP-Foro y PSOE, emitíu pel Canal10 Xixón, la eficiencia de l’alministración ye l’argumentu emplegáu pol candidatu del PSOE  al Senáu, Vicente Álvarez Areces, nes próximes elecciones xenerales del Estáu español, pa responder a la denuncia fecha por Lluis Miguel Orviz (Xuníos Podemos) de recortes d’unidaes  d’EI realizada pol Gobiernu Asturianu.

Anque la EI nun ye una etapa educativa obligatoria, sabemos que cuasi’l 100% del alumnáu de la segunda etapa ( 3 a 6 años) ta escolarizao. Ello débese a que pas y mas saben la importancia crítica  que tien esta etapa na posterior escolarización de Primaria. Nella l’alumnáu empincipa la so socialización deprendiendo a convivir colos sos compañeros/es y profesoráu interiorizando les primeres normes de convivencia social fuera la familia; amplia la so conocencia del mediu socio-natutal más allegáu y de si mesmu al traviés de la reflexón y la esperimentación; y anicia y desarrolla’l llinguaxe como mediu de comunicación y instrumentu de conocimientu.

Igual que les families son conscientes d’ello,  l’alministración tamién lo ye,  y por ello  publicó’l currículu de la Etapa concediéndo-y la importancia fundamental que tien  y el señor Areces-y quita por comeniencia o ignorancia. Poro, el recorte d’unidaes nesta etapa la educación pública xustificáu únicamente con un criteriu meramente economicista qu’entiende la eficiencia solo en términos d’ingresos-gastos; que nun tien en cuenta que la educación promueve valores non pecuniarios de desarrollu personal y social, compensación de desigualdaes sociales, equidá, calidá… ye un grave error de corte neolliberal y demuestra’l despreciu que se tien a la Educación Infantil. La baxada la natalidá del alumnáu d’esta etapa  tien d’aprovechase como una oportunidá pa meyorar la calidá de la educaciónde los rapacinos/es (claramente mermada depués de l’aplicación n’Asturies del “Real Decreto-ley 14/2012, de 20 de abril, de medidas urgentes de racionalización del gasto público en el ámbito educativo”) al traviés de les siguientes midíes:

  • Merma les ratios d’alumnáu per aula
  • Cubrir toles necesidaes d’apoyu con profesoráu
  • Reducción de les hores lectives del profesoráu, permitiendo asina organizar meyor la so llabor docente y preparación de materiales didácticos.

El Comercio 21/6/2016: “La cabeza de lista de PP-Foro, Susana López Ares, reafirmó ayer la «apuesta clara» de su formación con la educación concertada y con la defensa del derecho de los padres a elegir el modelo y el centro educativo para sus hijos”.

El derechu de los pas y mas a elexir centru  nun pue ser un criteriu absolutu y tar percima de la necesidá de planificación educativa. Esi “derechu” de llibre elección exércese nes fasteres  urbanes onde los que negocien cola educación (mayoritariamente escueles concertaes de la Ilesia Católica) tán presentes, tienen demanda y esta da ganancies ideolóxiques y económiques. Los pas y mas de les fasteres rurales nun tienen opción d’elexir y son solo atendíos pola única rede que garantiza el so derechu a la educación: La Pública. Esta rede tamién ta presente nes aries urbanes y, nos dos ámbitos qu’atiende, ve como añu tres añu se-y recorten recursos (unidaes, profesoráu, derechos a tresporte y comedor, presupuestos pal gastu corriente, obres de caltenimientu y meyora), mientres la educación concertada sigue recibiendo fondos públicos pal so caltenimientu que complementa con cuotes illegales vistíes d’aportaciones voluntaries  a les asociaciones de mas y pas que-y valen pa segregar al alumnáu con menos recursos económicos. Mientres la Pública sufre tolos años grandes axustes que se xustifiquen pola falsa “crisis económica”, “racionalización del gastu”, “la baxada de natalidá”, “la sacrosanta  eficiencia”,  la renovación de los conciertos realízase cada cuatro años depués d’axustar duramente la Pública.

En SUATEA sabemos que la única rede de centros d’enseñu que garantiza’l derechu a la educación de tola ciudadanía ensin distinción de creos, races, llugar de nacimientu o condición económica ye LA PÚBLICA.  Ye por ello polo que pidimos a tolos partíos que se presente a estes elecciones que la defendan y, dao qu’ella sola pue atender les necesidaes educatives de tola población nes meyores condiciones, se dexe de sovencionar con conciertos a les empreses privaes.

El secretariáu de SUATEA

N’Uviéu a 21 del 6 de 2016

Print Friendly, PDF & Email

Esta entrada está disponible en: Castellano (Castellanu)