SUATEA opónse a modificar la resolución d’almisión d’alumnáu

Avérase’l mes d’abril y con él el procesu de matriculación y almisión d’alumnáu nes nueses escueles. Ayeri, 4 de marzu, celebróse un plenu del Conseyu Escolar d’Asturies pa consultar a la comunidá educativa sobre’l “primer cambéu del Resolución de 26 de febreru de 2018, pola que s’aprueba’l procedimientu d’almisión del alumnáu en centros docentes non universitarios públicos y privaos concertaos del Principáu d’Asturies”.   

Plantégase esi cambéu pa camudar los criterios y el protocolu d’almisión del alumnáu de Necesidaes Educatives Especiales nos centros asturianos, retrotrayendo l’almisión d’esti alumnáu a estadíos anteriores la resolución de febreru de 2018.   

Hasta esta propuesta de cambéu, solo l’alumnáu que precisaba recursos singulares (compuestos por auxiliar educador/a, mediador/a de comunicación, fisioterapeuta o sofitos intensivos) o l’alumnáu que camudara de modalidá educativa (d’ordinaria a especial o viceversa) llevaría dictame d’escolarización. El restu solo llevaba un informe d’evaluación sicopedagóxica del so orientador/a de centru. Esto suponía na práctica que la mayoría del alumnáu con Necesidaes Específiques de Sofitu Educativu recibía los sofitos necesarios casi desque se detectaba la necesidá ensin tener que pasar el filtru d’una comisión  técnica. Amenorgábase asina la burocracia y dábase tol poder de decidir los recursos materiales y humanos a les y los orientadores, yá que naide cuestiona o fiscaliza la so opinión profesional. Esta forma d’actuar, según l’alministración, aumentó de forma esponencial el númberu d’alumnáu a atender y yera necesario acutalo colos cambeos que dientro poco se van regular por aciu  resolución.  

Col cambéu propuestu, va ser una comisión técnica la que va revisar los dictames d’escolarización propuestos polos/poles orientadores  y va decidir  qué recursos aplicar. Agora van revisase  polo normal  al rematar cada etapa educativa, retrasando asina l’aplicación de los apoyos.  

Otru aspeutu a tener en cuenta pa refugar esti cambéu ye que facilita la derivación del alumnáu con Necesidaes Educatives Especiales a centros específicos d’Educación Especial o unidaes específques nos centros ordinarios, lo que contradiz los principios educativos recoyíos na llexislación vixente, principios como la inclusión educativa, normalización, equidá o integración social.  

Llograr una educación que respete estos principios supón tener como oxetivu dar una respuesta educativa a la diversidá d’alumnáu que favoreza’l so máximu desenvolvimientu, y esanicie toles formes d’esclusión, desigualdá y vulnerabilidá, teniendo en cuenta un modelu coeducativu, dientro de redolaes segures, saludables, sostenibles y democráticos, nes que toles persones sían valoraes por igual.  

En SUATEA, consideramos que nun ye afayadizu’l tratamientu de l’atención a la diversidá y la inclusión con cambeos parciales de reglamentos varios. Por ello, esiximos a la Conseyería d’Educación que regule por aciu un Decretu tolos aspeutos relativos a la inclusión, la equidá y l’ atención a la diversidá.   

El Secretariáu de SUATEA  

N’Uviéu a 5 de marzu de 2020