Home > Comunicaos > SUATEA llogra ocho delegaos y delegaes nes elecciones sindicales

SUATEA llogra ocho delegaos y delegaes nes elecciones sindicales

 

Nes elecciones celebraes el pasáu 4 d’avientu presentábense SUATEA, UGT, ANPE, CCOO, CSIF, CSI y SINTTA (nuevu sindicatu de personal interino). Toos, sacantes la CSI, entren na Xunta de Personal por llograr el 5% de los votos. Sicasí, llogren abonda representación pa entrar en Mesa Sectorial namás los qu’algamen siquiera’l 10% de los votos: ANPE, UGT, CCOO y SUATEA (con unes diferencies poco significatives no que cinca al porcentaxe: oscilando ente’l 17,5% y el 21,5%).

Les resultancies en númberu de delegaos/es en Xunta de Personal son los siguientes:

ANPE: 10; UGT: 9; CCOO: 9; SUATEA: 8; CSIF: 4; SINTTA: 3.

Viendo’l resultáu, dende SUATEA valoramos que fueron diverses les causes que mos llevaron a perder dos delegados en comparanza  coles elecciones anteriores. Entá sabiendo que, ente los 4 sindicatos que vamos formar parte de les Meses Sectoriales de Negociación, el repartu y diferencia de votos ye bien pequeña, habiendo cambeos nes posiciones por un escasu númberu d’ellos, tamién ye cierto que quiciabes nun supimos tresmitir el nuesu trabayu nin comunicar los llogros algamaos o les posiciones de fuerza que caltuvimos en defensa del profesoráu. Tamién influyeron cuestiones como: la intervención de la Conseyería convocando la mesa sectorial sobre xornada llaboral en plena campaña electoral y namás col enfotu de qu’UGT y ANPE sofitaren lo mesmo que nun quixeron sofitar en septiembre y qu’asina enmendaren el so erru; la presencia de sindicatos que resten votos y que se pierden porque nin siquiera llogren el 5% pa entrar na Xunta de Personal o la concurrencia del sindicatu de personal interino SINTTA.

Sin embargo, queremos estima-yos a tolos nuesos votantes el sofitu recibíu y aseguramos que vamos siguir lluchando día ente día pa nun decepcionalos. El profesoráu asturianu reconoció, nos últimos dolce años en que presidimos la Xunta de Personal, el nuesu trabayu y la nuesa trayectoria, les nueses propuestes y el nuesu compromisu cola escuela pública asturiana y col personal docente que nella trabayamos. Nun vamos arrenunciar a aspiraciones que creemos siguen siendo necesaries y xustes: la meyora de les nueses condiciones llaborales, la xubida de nueses retribuciones ensin depender d’evaluaciones, la estabilidá llaboral del profesoráu interín, la defensa inclaudicable de la rede educativa pública, un modelu d’escuela laica, la demanda d’un cuerpu únicu d’enseñantes, la defensa del Asturianu y del Gallego-asturiano, un compromisu pola coeducación y l’igualdá de xéneru y pola prevención de la homofobia y los derechos de los colectivos LGTBi. Comprometémonos a siguir lluchando pa llograr una Escuela Pública calidable y una sociedá más xusta y democrática.

 

Uviéu 6 d’avientu 2018

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3778

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3778