Home > Asturianu > SUATEA llogra l’aprobación nel CEE de la especialidá del asturianu y midíes contra la violencia de xéneru

SUATEA llogra l’aprobación nel CEE de la especialidá del asturianu y midíes contra la violencia de xéneru

Esti martes 23 de setiembre reunióse’l Conseyu Escolar del Estáu y aprobáronse una serie d’enmiendes y meyores al documentu presentaes por STEs-intersindical. Defendióles Beatriz Quirós, conseyera y miembru de SUATEA sacando l’aceptación per parte del plenu de dalgunes qu’afecten directamente al sistema educativu asturianu. Ye’l casu del encamientu que se fai al Ministeriu d’Educación pidiendo la inmediata creación de la especialidá de Llingua Asturiana, pa poner en situación d’igualdá al alumnáu de la nuesa Comunidá Autónoma y al profesoráu qu’imparte Llingua Asturiana y Gallego-asturianu col  restu de llingües propies o oficiales del Estáu. Esta propuesta aceptóse por 34 votos a favor, 26 en contra y 6 abstenciones.

Otra de les propuestes aceptaes tien que ver cola necesidá d’enllantar nel  ámbitu educativu un plan de choque contra la violencia de xéneru, faciendo dende’l Ministeriu d’Educación un esfuerzu presupuestariu pa desenvolver programes de coeducación nos centros, según la puesta en marcha nes distintes alministraciones educatives de formación específica, tanto inicial como permanente pa tol profesoráu en rellación cola prevención de la violencia contra les muyeres. Esta propuesta aceptóse por 42 votos a favor, 20 en contra y 7 abstenciones.

Dende SUATEA celebramos l’éxitu de les propuestes y esperamos que’l Ministeriu d’Educación faiga ecu d’elles y se comprometa na so aplicación.

Uviéu, 23 de setiembre del 2014

VER EN PDF: 140923 Propuestas Consejo Escolar Estatal

Esta entrada tamién se puede consultar en: Castellanu