Home > Comunicaos > SUATEA gana contenciosu por los impagos al profesoráu itinerante

SUATEA gana contenciosu por los impagos al profesoráu itinerante

SUATEA GANA CONTENCIOSU  RECLAMANDO  A LA CONSEYERÍA D’EDUCACIÓN LOS IMPAGOS  POR ITINERANCIA DE TOL CURSU 2015-16

El xulgáu de lo contencioso-alministrativo númberu 4 d’Uviéu, en sentencia 00226/2016, de 7 de payares de 2016,  reconoz a dos itinerantes representaos polos servicios xurídicos de SUATEA, el derechu a cobrar tolo que la Conseyería d’Educación-yos quitó nel cursu 2015-2016, consecuencia de la intrepretación restorcida ya interesada (aforru de cuartos) qu’ésta vien faciendo del “Acuerdo sobre las condiciones de trabajo del profesorado itinerante de 2001”.

Nel  separtáu 5.1 del alcuerdu, según el Maxistráu xuez, danse claramente los criterios pal cálculu de les indemnizaciones  que se recibirán en función de los  km contabilizaos pa dir y tornar de los percorríos peles escueles a les que s’itinera, teniendo como puntu de salida y llegada de la xornada llaboral el centru nel que fue nomáu’l profesoráu. Esi ye l’únicu referente que se tien de tener en cuenta pal cálculu de la indemnización económica por itinerancia según la sentencia y non les sides argumentaes pola almininstración pa encurtiar recorríos y aforrar perres:

“En este sentido deben rechazarse las interpretaciones forzadas tanto desde el punto de vista presupuestario como indemnizatorio y parece apropiado y prudente y eficaz tener en cuenta una regla tan sencilla como la del Acuerdo para racionalizar la actuación de los propios profesores.

Pero es que, además, la aplicación del principio de seguridad jurídica y, en particular, la confianza legítima de los funcionarios sometidos al régimen de itinerancia educativa impide un cambio de la interpretación de un Acuerdo que hasta el curso anterior se aplicaba pacíficamente.”(lliteral conteníu nel fundamentu de derechu quintu de la sentencia).

Con fecha 3 d’ochobre de 2016, la Conseyería Educación, mandó a les direcciones de los centros, unes intrucciones de cumplimentación de los partes d’indemnización económica por itinerancia nes que s’apliquen esactamente los criterios echaos abaxo pola sentencia anterior. Antes de conocese esta sentencia, SUATEA presentó’l 27 d’ochobre de 2016, un recursu de reposición contra estes instrucciones, que dende’l nuestru puntu de vista son contraries a derechu.

Por tolo espuesto, dende SUATEA esiximos a la Conseyería Educación:

Cumplimientu de la lexislación vixente: “Acuerdo sobre las condiciones de trabajo del profesorado itinerante”.

El pagu inmediatu a tol profesoráu itinerante de toles perres que se-y quitaron nel cursu 2015-16 con argumentaciones contraries a derechu.

Retirada de les “Instrucciones para cumplimentar el impreso de orden de comisión de servicio para profesorado itinerante y otros desplazamientos de personal docente” de 3 d’ochobre de 2016.

El pagu de les indemnizaciones por itinerancia d’esti cursu 2016-17 acordies col “Acuerdo sobre las condiciones de trabajo del profesorado itinerante”.

La meyora de les condiciones económiques y del trabayu del profesoráu intinerante: aumentu de la indemnización económica per Km, pagu mensual de los gastos por itinerancia, complementación hasta cobertura a tou riesgu del seguru del vehículu del personal itinerante con sustitución del vehículu siniestráu mientres s’igua…

 

El secretariáu de SUATEA

Uviéu, 9 de payares de 2016

Esta entrada tamién se puede consultar en: Castellanu