SUATEA pide saber les consecuencies de la prorroga nes oposiciones

SUATEA ESIXE AL CONSEYERU D’EDUCACIÓN ESPLICACIÓN SOBRE LES CONSECUENCIES DE LA PRÓRROGA PRESUPUESTARIA NA UFIERTA D’EMPLÉU PÚBLICU DOCENTE

Énte la noticia de la prórroga presupuestaria del gobiernu del Principáu d’Asturies pa 2016, dende SUATEA esiximos esplicaciones inmediates del Conseyeru d’Educación al respective de les repercusiones qu’esta situación va tener nel ámbitu educativu. El Conseyeru comprometióse cola Xunta de Personal Docente a aprobar una ufierta d’empléu públicu docente d’unes 400 places d’Educación en Secundaria, Formación profesional y otres enseñances de réxime especial pa 2016. Agora bien, en feches posteriores, tal como se recoyó en distintos medios de comunicación, el Conseyeru condicionó la convocatoria d’eses places a l’aprobación de los presupuestos. La noticia de güei de que se prorroguen los presupuestos pa 2016 xeneró incertidume y molición ente’l profesoráu interino y tolos aspirantes que tán somorguiaos na preparación d’esos procesos selectivos. Necesiten saber a qué atenese lo antes posible y el Conseyeru débe-yos darréu una esplicación.
Ye un momentu bien relevante pa esti colectivu: nel ámbitu estatal, anúnciense cambeos nel sistema d’accesu a la función pública docente, como l’anunciáu MIR educativu que, de perfacese, va tener importantes efectos negativos nel colectivu. Nel ámbitu autonómicu, la incertidume pola convocatoria o desconvocatoria d’oposiciones, amás de los efectos qu’estes oposiciones pueden provocar nel futuru llaboral d’esti colectivu, qu’ensin dulda va ser inciertu si se caltién l’Alcuerdu en vigor,  ensin suscribir por SUATEA, col que’l profesoráu interín asturianu ta discrimináu en comparanza con otros territorios nos qu’esisten pactos d’estabilidá pa esti colectivu.

Por ello, pa tratar toes estes cuestiones, dende SUATEA convocamos asamblea informativa empobinada al profesoráu interín asturianu, el próximu 18 de xineru nel IES Aramo d’Uviéu, a les 18.00 hores.