Home > Comunicaos > SUATEA esixe un presupuestu que mire poles necesidaes educatives

SUATEA esixe un presupuestu que mire poles necesidaes educatives

SUATEA ESIXE QUE’L GOBIERNU FAIGA UN PRESUPUESTU QUE MIRE POLES DEMANDES Y NECESIDAES DEL SISTEMA EDUCATIVU

El gobiernu asturianu retiró enantes de debatilu na Xunta Xeneral el proyectu de presupuestos correspondientes al añu que vien, 2016. Esto quier dicir que’l gobiernu renuncia a la posibilidá de qu’Asturies disponga d’esti instrumentu p’acabar colos retayos y cola llamentable situación que güei pasa l’enseñu públicu y el profesoráu. Según estudios que tien presentaos SUATEA, Asturies ye de les Comunidaes Autónomes que más profesoráu perdió nos últimos años y que más recortes fixeron nes partíes presupuestaries destinaes a la educación pública. Tamién somos la comunidá autónoma onde l’incrementu d’horariu llectivu y non llectivu del profesoráu ye mayor. La precariedá ta llantada dientro del nuestru sistema educativu y les medies xornaes convirtiéronse en cosa normal na nuestra comunidá. La inestabilidá de les plantiyes que cambien tolos cursos, la destrucción d’emplegu estable pa convertilo en precario, la implantación d’un sistema de xestión de les llistes de profesoráu interín que penaliza gravemente a los nuestros en comparanza colos d’otres comunidaes onde hai estabilidá, son elementos que nun pueden caltenese nel próximu exerciciu.

Miles de docentes y d’aspirantes a selo tán nestos díes tomaos poles dudes viendo’l silenciu del Conseyeru d’Educación sobre la convocatoria de la Ufierta d’Emplegu Público, como ya avisó SUATEA va unos díes. Mientres n’otres CCAA ta negociándose esta ufierta coles organizaciones sindicales, n’Asturies sigue castigándose al profesoráu que sigue ensin saber a qué atenese, magar de les promeses feches na campaña electoral.

Por too ello fai falta un presupuestu qu’acabe colos recortes y entame a poner los pegollos pa que la educación pública y el so profesoráu recuperen lo que se-yos quitó nestos últimos años. Ente otres cuestiones, reclamamos éstes:

  • Los presupuestos tienen que contemplar la integración de les escueles de O a 3 años nel sistema públicu, igual que’l segundu ciclu d’Educación Infantil.
  • Nesos presupuestos hai que concretar cómo se va desenvolver el Decretu d’Orientación Educativa, fundamental pa l’atención a la diversidá, una de les bases pa meyorar la calidá educativa, especialmente nestos momentos de crisis. Ensin presupuestos pa cubrilo, esti desarrollu quedaría nel aire.
  • Ye tiempu d’acabar colos retayos que tanto mancaron a les condiciones llaborales del profesoráu, quitando 3 hores de los periodos llectivos del profesoráu tanto de Secundaria como de Primaria y pudiendo asina volver a tener los apoyos y desdobles de grupos que se suprimieron.
  • Les medies xornaes nun pueden siguir siendo la norma de los contratos del profesoráu interín; tienen que prevalecer les xornaes enteres y menguar les itinerancies, qu’amás tán siendo atacaes con recortes envede revisase al alza’l pagu polos kilómetros realizaos.
  • Ye necesario tamién un presupuestu que valga pa cumplir colos compromisos de creación d’institutos y centros que se precisen en munchos llugares d’Asturies, igual qu’hai que facer un plan d’obres p’atender los arreglos de los edificios que tán funcionando estrozaos al nun mirar por ellos en munchu tiempu.
  • Precísense unos presupuestos qu’atiendan l’aumentu de la demanda de la formación profesional, una FP al serviciu de la sociedá que nun dexe fuera a la xente que nesti contestu económicu ve esta formación como una posibilidá d’acceder a un trabayu.

Estos son solo dellos de los elementos que faen imprescindibles unos presupuestos nuevos pal añu que vien. D’esti gobiernu y d’estos grupos parlamentarios que tenemos, depende que nun se pierda la oportunidá d’acabar colos retayos y recuperar los años d’atrasu que dexaron empatonada a la escuela pública asturiana.

Uviéu, 27 d’avientu de 2015

 

 

Esta entrada tamién se puede consultar en: Castellanu