Suatea esixe un accesu estraordinariu y específicu pa consolidar emplegu interín

Esta entrada está disponible en: Castellano (Castellanu)

ANTE LA UFIERTA D’EMPLÉU PÚBLICU HISTÓRICA ANUNCIADA POL GOBIERNU, SUATEA ESIXE LA CONSOLIDACION DEL EMPLÉU INTERÍN

Nesti momentu, el Gobiernu estatal entamó una negociación colos sindicatos de la Mesa Xeneral de Función Pública pa encetar de cara a los próximos Presupuestos Xenerales del Estáu una posible solución a les altes tases d’interinidá en tolos sectores públicos, incluyíu l’educativu. Ante les distintes declaraciones per parte del gobiernu central apostando por consolidar l’empléu interín, , y tres la firma per  parte de dellos sindicatos de la Mesa Xeneral de convocatories masives d’ufierta d’empléu públicu, dende SUATEA queremos repitir les demandes históriques del profesoráu interín que’l nuesu sindicatu lleva defendiendo dende va años.

–          La concreción d’esta ufierta nun puede llevase a cabu ensin tener en cuenta la especificidá del sector educativu y tien de ser axustada col MEC na Mesa Sectorial d’Educación. Esti sector devasa 150.000 docentes interinos (n’Asturies, 3.000) y esixe que cualquier decisión que se tome se faiga onde realmente ta representáu’l profesoráu.

–          Ye necesario y de xusticia consolidar de verdá nel empléu a tol profesoráu interín que ta trabayando anguaño y al qu’apurra esperiencia docente na enseñanza pública.  Pa ello, les necesidaes del sistema educativu pasen por alcordar un sistema d’accesu estraordinariu y específicu, distintu     del  qu’anguaño ta en vigor, qu’apenes valora la capacidá pedagóxica de los/les aspirantes. Dende SUATEA y  los STEs, apostamos por un modelu d’accesu a la función docente específicu y estremáu que garantice que tol profesoráu interín que ta anguaño trabayando consolide’l so empléu de forma definitiva.

–          La inmensa mayoría del profesoráu interín yá superó procesos de selección y tien sobradamente demostrada esta capacidá docente colos munchos años d’esperiencia satisfactoria. Poro, a la de plantegar l’afitamientu nel empléu, tien de ser valorada sobremanera la esperiencia que lu habilitó pa exercer el llabor docente.

–          Distintes sentencies de Tribunal de Xusticia de la Unión Europea y una tasa d’interinidá y precariedá insostenible na Educación y na Función Pública en xeneral, xunto cola llucha del profesoráu interín fixeron que’l gobiernu tenga que mover ficha y dar una respuesta a una situación abusiva.

 

Esperemos que nun  se mallogre esta oportunidá histórica y s’algame la estabilidá del sistema educativu al traviés del afitamientu del empléu qu’agora ye precariu ya inestable. Dende SUATEA faemos un llamamientu al profesoráu interín pa tar vixilante y participar nes Asamblees Informatives que vamos convocar llueu.

El secretariáu de SUATEA

Uviéu, 29 de marzu de 2017

 

Print Friendly, PDF & Email

Esta entrada está disponible en: Castellano (Castellanu)