SUATEA ESIXE responsabilidaes pol caos nel empiezu de cursu

LOS PROBLEMES REPÍTENSE CADA AÑU MAGAR LES REPITÍES ALVERTENCIES

El Conseyu de Gobiernu acaba de faer suyes les sides del conseyeru d’Educación xustificando’l caos sufiertu pol profesoráu interín y los centros educativos asturianos.

A SUATEA présta-y que’l gobiernu reconoza’l so estrueldosu fracasu en materia de xestión de les llistes d’estos docentes y que se comprometa a modificar el calendariu d’axudicaciones y a adoptar midíes pa evitar que se repitan actuaciones como les que venimos sufriendo n’ Asturies.

Sicasí, SUATEA llamenta fondamente que tuviera qu’asoceder un desastre d’esti calibre pa que’l gobiernu recapacite y acepte daqué que dende’l nuesu sindicatu veníamos demandando va años. Llevamos faciendo propuestes de meyora del sistema de xestión de llistes ensin merecer l’atención de la conseyería. En cuenta de negociar, optó pola imposición del calendariu de pidimientos col refugu sindical, por nun dar plazos de reclamación xenerando asina la indefensión del profesoráu interíno, por forfugar hasta l’últimu momentu les axudicaciones, por nun prorrogar los contratos del profesoráu per unos díes pa garantizar los esames de setiembre…

El Conseyeru d’Educación caltuvo a la mayor parte del equipu responsable d’estes cuestiones. Tuvo tiempu de ver el caos que la selmana pasada se producía pol pésimu funcionamientu de la plataforma de pidimientos y posibilitar l’allongamientu los plazos como pidíemos insistentemente dende SUATEA. Nun lo fixo y los peores badagüeyos cumpliéronse.

Nun fueron estos los únicos problemes esti branu.

Nel casu del procesu selectivu celebráu esti cursu, los erros de l’alministración fueron munchos. Los principales derivaos de la falta de tresparencia de tol procesu o del intentu d’anular la fase de concursu dempués de la oposición (recordemos les instrucciones – que dempués tuvieron que retirar- que dende la conseyería diérense pa que namá aprobara la fase d’oposición el mesmu númberu de persones que de places convocaes) .

Amás, la situación agravóse de resultes de l’aplicación del alcuerdu sobre xestión de llistes del profesoráu interíno promovíu pola anterior conseyera y robláu por FETE-UXT y ANPE. Na nuesa see siguimos recoyendo reclamaciones de profesoráu que foi escluyíu de les llistes d’interinos tres la rebaremación de les llistes aplicando dichu alcuerdu.

Podríemos tamién añedir como erros pa correxir per parte del gobiernu, la proliferación de medies xornaes, que fai que l’empléu docente precariu algame un 30%, o los fallos a la d’atribuyir places yá axudicaes a funcionarios de carrera, o la falta convocatoria de places reiteradamente demandada polos equipos directivos, o la concesión de comisiones de serviciu “compartíes” de duldosa llegalidá, o’l desastre na convocatoria de places nos conservatorios….

La Conseyería d’Educación tien de recuperar les competencies perdíes na xestión de personal. Dende la dómina de la conseyera Migoya, nes que se-y retiraron, la xestión foi emperorando con muncho. El crack del 31 d’agostu nun foi sinón una amuesa de lo qu’asocede nesta Conseyería. Deben entós correxise los erros de raigañu. De lo contrario, nun vamos tar a salvu de qu’un desastre como esi s’arrame a otros ámbitos entá más delicaos como la xestión académica y los millones de datos güei en manes d’empreses privaes.

Acabar cola esternalización y privatización de servicios, recuperar les competencies, dotar de personal a la conseyería y diálogar coles organizaciones sindicales pueden ser bones recetes pa evitar males mayores na educación Asturiana.