Home > Aición sindical > SUATEA esixe l’atención a les reclamaciones na corrección d’erros y un nuevu Alcuerdu d’Interinos

SUATEA esixe l’atención a les reclamaciones na corrección d’erros y un nuevu Alcuerdu d’Interinos

Na reunión d’esta mañana a instancies de SUATEA col Director Xeneral de Personal de la Conseyería d’Educación, esti sindicatu plantegó la necesidá d’iguar los grandes problemes que s’asoleyen na publicación de los llistaos de profesoráu interín.

Hai dellos tipos de problemes: dende persones qu’apaecen ensin la nota correspondiente a los procesos selectivos, hasta erros na puntuación de los diferentes apartaos, falta de reconocimientu de títulos universitarios o espedíos pola propia conseyería…

Al tiempu visualícense les graves consecuencies del Alcuerdu d’Interinos del 2014, como la esclusión de los llistaos de milenta docentes que formaben parte de los mesmos. Persones que tando nuna determinada llista, presentáronse a otres especialidaes cola intención de meyorar les sos espectatives llaborales y que s’alcuentren con que l’Alcuerdu d’Interinos esplúsalos de les llistes que nes que taben – ainda presentándose notres CCAA – anque los almitan na nueva si ye que cumplen colos requisitos.

Ye dicir, qu’esti Alcuerdu, robláu por ANPE y FETE ta siendo una llaceria pal profesoráu interín que se agora con estupor cómo empioren les espectatives llaborales de milenta docentes qu’hasta’l pasáu cursu trabayaben nuna especialidá y a partir d’agora yá nun lo van poder facer. La obligatoriedá de presentase a procesos selectivos y los rebuscaos criterios de permanencia o accesu a les llistes que recueye esi Alcuerdu ye la casua fundamental d’esta llaceria.

SUATEA mostró nuevamente’l so refugu a esti Alcuerdu y señaló la necesidá de cambialu asina como cambiar radicalmente la forma na que se xestionen les llistes, les convocatories, los procedimientos selectivos, etc. Ye imprescindible una nueva regulación que muestre un mínimu de respetu pa col profesoráu interín asturianu y que garantice la so estabilidá.

Agora la pilota ta nel teyáu de l’Alministración: el Conseyeru d’Educación nun puede consentir que la so primer xestión al frente de la conseyería sea una chambonada que conculque los derechos del profesoráu. SUATEA esixe que s’igüen los erros del llistáu y que s’atiendan les reclamaciones. Y si se tienen que retrasar los procedimientos d’axudicación pa garantizar los derechos del profesoráu hai qu’aplazar la convocatoria. Y lo que ye inaplazable ye la negociación d’un nuevu Alcuerdu d’Interinos qu’igüe esta llaceria.

Secretariau d’Asturies de SUATEA

Esta entrada tamién se puede consultar en: Castellanu