Home > Comunicaos > SUATEA esixe l’afitamientu nel empléu del profesoráu interín.

SUATEA esixe l’afitamientu nel empléu del profesoráu interín.

Na mañana de güei desenvolvióse una primer xunta del grupu de trabayu convocáu pola Conseyería d’Educación pa informar sobro los planes de la mesma de cara a la ufierta d’emplegu públicu docente de 2017 que va executase nos próximos cursos. Esta OEP concreta l’alcuerdu pal  ameyoramientu del empleguu públicu robláu’l pasáu 29 de marzu ente Comisiones Obreres, FeSP-UXT, CSIF y el Ministeriu de Facienda. Nel mesmu plantégase l’amenorgamientu de la tasa actual d’interinidá, que nel casu d’Asturies supera’l 30 %, hasta algamar el 8%.

Conocíos los datos, y a la espera de la so definitiva concreción por especialidaes, la primer impresión ye que la propuesta de places ufiertaes dende la Conseyería queda bien per debaxo de les mires xeneraes. La propuesta plantega un total de 1106  places distribuyíes ente los distintos cuerpos docentes: Maestros 702, Secundaria 284, Formación Profesional 72, Música y artes escéniques 24, Escueles Oficiales d’Idiomes 5, Artes plástiques y diseñu 15 y Maestros de taller 3.

Énte esto, SUATEA manifestó una serie de cuestiones:

1.- Esta ufierta d’empléu públicu docente tendría d’executase a lo llargo de los próximos cinco años, como se  propón dende’l mesmu Ministeriu d’Educación.

2.- Paeznos perimportante que, énte una convocatoria estraordinaria como l’actual, se faiga una regulación específica del sistema d’accesu que reconoza y valore la esperiencia docente que vien desendolcando’l personal interino dende va años nos distintos centros educativos. La regulación del sistema d’accesu ye de calter estatal pero treslladémos-y  a la Conseyería la nuesa posición col envís de que la faiga llegar a la Conferencia Sectorial d’Educación, d’ámbitu estatal, del MEC.

4.- Creemos qu’esta convocatoria debería de valir pa facilitar el procesu d’afitamientu nel emplegu del personal interino qu’ocupa les places.

Sía que non, dende SUATEA, vamos siguir denunciando too aquello que torgue esi afitamientu. Por ello queremos recordar la nuesa oposición al alcuerdu de profesoráu interín vixente anguaño na nuesa comunidá, que fomenta la rotación nel empléu y los despidos, como se reconoció na PNL aprobada pola Xunta Xeneral en febreru del añu 2016.

SUATEA valora positivamente la convocatoria d’emplegu públicu anunciada pa los siguientes años cola condición de qu’esa OEP tien de sirvir pa consolidar nel emplegu a quien anguaño vienen desenvolviendo’l so trabayu en condiciones de precariedá.

El secretariáu de SUATEA.

Esta entrada tamién se puede consultar en: Castellanu