SUATEA esixe la consolidación del emplegu interín

Esta entrada está disponible en: Castellano (Castellanu)

ANTE LES NEGOCIACIONES QUE SE TÁN TENIENDO COL GOBIERNU ESTATAL, SUATEA ESIXE LA CONSOLIDACIÓN DEL EMPLEGU INTERÍN.

La situación del profesoráu interín ta faciéndose insostenible. En delles CCAA algama yá un 40 % del total de les plantiyes. Tases ente un 20 y un 30% aveza habeles na mayoría  los territorios. Ye otra de les consecuencies de les polítiques de retayos y de la eliminación de les tases de reposición. La inestabilidá y l’avieyamientu de la media d’edá del profesoráu funcionariu de carrera son otres cares d’esti mesmu problema, que s’agrava cursu tres cursu. Esto ta enzancando gravemente’l desenvolvimientu de proyectos educativos a mediu o llargu plazu, perxudicando al  alumnáu de les zones más alloñaes xeográficamente de les capitales.

Esta situación, tal que yá alvirtió la xusticia europea, viose desvirtuada pol abusu na so contratación, pola cobertoria de vacantes estructurales por profesoráu interín y el correspondiente aumentu de les tases d’interinidá nes distintes CC.AA. y pola llende impuesta pola denominada “tasa de reposición”. Per otra parte, la precariedá del colectivu foi n’aumentu nos últimos años y rescampla’l desfase ente la formación recibida, les necesidaes del sistema educativu y un sistema d’accesu a la función pública docente claramente caducu, non aparente, suxetivu y alloñáu de la práctica docente.

Delantre esta situación escepcional, la Confederación de STES a la que pertenez SUATEA y una serie d’asociaciones de profesoráu interín constituyimos una plataforma estatal pa ellaborar una PROPUESTA MARCU D’ACCESU A LA FUNCIÓN PÚBLICA DOCENTE NON UNIVERSITARIA Y PAL AFITAMIENTU DEL EMPLÉU DEL PROFESORÁU INTERÍN.

Por estos motivos, esbozaos con calter xeneral, ye necesario arbitrar midíes llaboralmente xustes y al tiempu eficaces, col mayor consensu posible, pa resolver los problemes de la temporalidá y de precariedá del profesoráu interín, asina como los cambeos nel sistema d’accesu a la función pública docente que contribuyan a estos oxetivos.

El Gobiernu estatal entamó una negociación colos sindicatos de la función pública pa encetar de cara a los próximos Presupuestos Xenerales del Estáu una posible solución a les altes tases d’interinidá en tolos sectores, non solo nel educativu. Tamos entós nun momentu clave pal futuru del profesoráu interín.

Dende SUATEA, amosemos la nuesa esmolición por qu’esta negociación se lleve  a cabu ensin tener en cuenta la especificidá del sector educativu. Esti sector, que sufrió retayos adicionales en forma d’aumentu del horariu lectivu y del númberu d’alumnáu per aula ente otros, tien especificidaes que riquieren que cualquier decisión que se tome se faiga dientro de la Mesa Sectorial d’Educación, onde realmente ta representáu’l profesoráu. Per una parte, tenemos de recordar que’l sistema d’oposiciones actual inclúi pruebes de calter memorísticu y suxetivu, que favorecen l’arbitrariedá, y nes que nun se valora la capacidá docente. La inmensa mayoría del profesoráu interín yá superó procesos de selección y tien sobradamente demostrada esta capacidá con años d’esperiencia satisfactoria. Por tanto, ye esta esperiencia la que tien de ser tenida en cuenta sobremanera a la hora de plantegar l’afitamientu nel empléu.

Ye necesario alcordar un modelu d’accesu a la función docente específicu y estremáu que garantice que n’esti procesu naide vaya a perder el so puestu de trabayu. El mesmu Estatutu Básicu del Emplegáu Públicu (EBEP) reconoz esta posibilidá nel artículu 61: “Namá en virtú de llei va poder aplicase, con calter escepcional, el sistema de concursu que va consistir namá na valoración de méritos”. Amás, hai que tener en cuenta les posibilidaes d’afitamientu d’empléu temporal de la disposición Transitoria Cuarta de la mesma norma.

En munches Comunidaes Autónomes esisten pactos que garanticen dalguna manera la estabilidá del profesoráu interín. Nun ye esi’l casu d’Asturies. La nuesa reivindicación, tanto nel ámbitu estatal como nel asturianu, ye que, hasta que nun s’algame la funcionarización plena del profesoráu interín, s’alcuerde un Pactu d’Estabilidá nel Empléu pa que naide quede escluyíu del so puestu de trabayu.

Esti ye unu de los retos que nesti momentu tien el sistema públicu: llograr la estabilidá del sistema educativu al traviés del afitamientu del empléu qu’agora ye precariu ya inestable. Nesta llucha, SUATEA y la Confederación de STES llevamos años enfotaos. Esperemos que la cerrazón de dalgunos y el despreciu d’otros escontra’l profesoráu interín nun mallogre esta oportunidá histórica de consolidar el so empléu y s’acabe cola precariedá y la inestabilidá.

Uviéu ,24 de marzu de 2017

Print Friendly, PDF & Email

Esta entrada está disponible en: Castellano (Castellanu)