Home > Comunicaos > SUATEA esixe amenorgar l’horariu del profesoráu como en Cantabria

SUATEA esixe amenorgar l’horariu del profesoráu como en Cantabria

SUATEA ESIXE AL GOBIERNU ASTURIANU MIDÍES CONCRETES COMO L’AMENORGAMIENTU HORARIU P’AMEYORAR L’ATENCIÓN EDUCATIVA ASINA LO TÁN FACIENDO GOBIERNOS COMO’L CÁNTABRU O‘L BALEAR

 

El Conseyeru d’Educación de Cantabria acaba d’anunciar l’amenorgamientu del horariu lectivu pal profesoráu. Concretamente plantégase un amenorgamientu p’anguaño de 19 hores lectives y de 18 pal añu próximu nel casu del profesoráu de secundaria y enseñances de FP y réxime especial.

SUATEA y la Confederación de STEs a la que pertenez tamos desenvolviendo una campaña en tol estáu pa llograr recuperar les condiciones llaborales del profesoráu anteriores a los retayos. Nesti sentíu, el nuesu pidimientu ye’l de que l’horariu lectivu de tol profesoráu sía amenorgáu en tres hores lectives.

La Conseyería d’Educación n’Asturies entá nun respondió a esta propuesta, que ye una demanda del profesoráu pa poder faer frente a les xeres derivaes de la cada vez más complexa situación de les families y l’alumnáu.

Adoptar esta midida supondría reconocer el trabayu del profesoráu y empezar a esaniciar los retayos sufiertos pola escuela pública. D’esta manera sería posible atender más afechiscamente a la diversidá del alumnáu, tener más tiempu pa trabayar n’equipu y pa llograr l’ésitu educativu de tol alumnáu. Esta midida combinada col amenorgamientu pa mayores de 55 contribuyiría amás a la creación d’empléu nel ámbitu educativu.

En Cantabria, el Conseyeru socialista paez entamar l’aldu correctu. N’Asturies sería incomprensible que la crítica a los retayos del PP per parte del gobiernu quedare en palabrería. Ye hora d’adoptar midíes qu’ameyoren la calidá de la enseñanza y la situación llaboral del profesoráu. Otres comunidaes autónomes amuesen el camín. Tienen d’habilitase partíes presupuestaries pa ello. Si sigue ensin haber presupuestu, los distintos grupos políticos tienen d’asumir que yá ye hora de devolver al profesoráu lo que se-y quitó.

SUATEA va treslladar estos pidimientos tanto al Conseyeru d’Educación como a los grupos parlamentarios pa que 2016 sía l’añu del fin de la LOMCE y los retayos na educación pública.

Secretariáu d’Asturies de SUATEA-STEs

12-1-16

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743