Home > Comunicaos > SUATEA énte’l proyectu de la LOMLOE

SUATEA énte’l proyectu de la LOMLOE

LA LOMLOE AMEYORA ASPEUTOS LESIVOS DE LA LOMCE, PERO YE UNA OPORTUNIDÁ PERDIDA P’AVANZAR HACIA LA ESCUELA QUE QUEREMOS

Cola aprobación güei de la reforma de la LOE-LOMCE per parte del Conseyu de Ministros, entama la tramitación parlamentaria de la nueva Llei educativa.

Dende SUATEA, celebramos ensin dulda la eliminación de los aspeutos más lesivos de la LOMCE (segregación del alumnáu, eliminación de competencies a claustros y conseyos escolares, calificación de la materia de Relixón, reválides, etc.), pero echamos de menos una apuesta más valiente que dexara facer  realidá dalgunes de les nueses reivindicaciones HISTÓRIQUES: eliminación de los conciertos educativos, la enseñanza relixosa fuera del currículu, la reversión efeutiva de los retayos aplicaos a la educación a partir de 2012, etc. 

Celebramos que la coeducación, la inclusión ya inclusive la crisis climática sían aspeutos centrales de la esposición de motivos, pero hai otros aspeutos y delles faltes que suponen tar llueñe de la tresformación fonda qu’el nuesu sistema educativu precisa:

–     La rede de centros. La doble rede pública/rede concertada del sistema educativu español representa una anomalía dientro  la Unión Europea. Rescampla que la esistencia de la doble rede de centros supunxo y supón la segregación del alumnáu, aspeutu gafu y dañible qu’atenta contra un principiu básicu: la Escuela tien de ser el principal elementu d’integración y cohesión social, y namás la Escuela Pública pue xugar esi papel fundamental. Polo tanto, dende SUATEA apostáramos por una nueva Llei que supunxera, de forma definitiva, el fin de la rede de centros concertaos, como históricamente reivindica gran parte de la sociedá.

–     Los currículos y les exes tresversales. Na nueva Llei fáense alusiones asgaya a les llamaes exes tresversales (valores), pero entendemos qu’estos valores tienen de concretase nel currículu de cada materia y tener reflexu nes programaciones. Ye menester esixir el so cumplimientu, pos solo d’esta forma van tener el protagonismu qu’ameriten. Los currículos de les distintes materies tienen de ser oxetu d’una revisión fonda, tanto cualitativa como cuantitativa. 

–     La xestión democrática de los centros. Ye menester avanzar nun funcionamientu más democráticu de los centros, pos la elección de les direcciones va siguir dependiendo en gran parte de l’Alministración.

–     La relixón, fuera de la Escuela. Ye necesario avanzar hacia la llaicidá del sistema educativu.

–     Los aspeutos rellacionaos cola inclusión y la equidá tienen de ser una prioridá p’ameyorar el sistema educativu con perspeutiva social y non mercantilista. Hai munchos aspeutos qu’hai qu’ameyorar con urxencia: la desigualdá, qu’en munchos casos vese empeorada por una segregación educativa creciente por motivos socioeconómicos; altes tases d’abandonu escolar; el riesgu de probitú y esclusión social; y una atención a la diversidá que nun respuende a les necesidaes del alumnáu, que ta mal dotada tocantes a recursos y que causa en munches ocasiones abandonu y esclusión escolar. Pa face-y frentea esta situación, reclamamos revertir los retayos de los últimos años y ameyorar la dotación presupuestaria de la escuela pública al respective de:

•    Amenorgamientu de les ratios, imprescindible pa una atención personalizada del alumnáu.

•    Revisión de les condiciones llaborales del profesoráu: amenorgamientu de xornada llectiva, facilidaes pa la formación permanente, estabilidá de les plantiyes, planes d’estabilidá pall profesoráu interino, etc.

•    Refuerzu de los Equipos y Departamentos d’Orientación p’ameyorar la convivencia nos centros educativos y atender la diversidá nes aules.

Per otru llau, ye esmolecedor que’l Ministeriu d’Educación nun convocara nenguna mesa de negociación colos sindicatos, nin qu’escuchara a la comunidá educativa pa consensuar una nueva Llei, que ye una reforma de la LOMCE y una vuelta a la LOE que nel so momentu SUATEA y los STES-i yá calificaron d’insuficiente. Perdióse una oportunidá pa que’l profesoráu y la comunidá educativa, que son quien finalmente apliquen la llei, puean opinar y aldericala enforma.

Resumiendo, la LOMLOE supón una meyora al respective de la LOMCE porque esanicia los sos aspeutos más lesivos, pero ye claramente insuficiente pa quien esperábemos un compromisu claru ya inequívocu cola Escuela Pública, un compromisu con una escuela llaica, inclusiva, equitativa, compensadora de desigualdaes, coeducativa, democrática, comprometida con un mundu más xustu y respetuosa coles llingües y cultures territoriales. L’aprobación de la LOMLOE supón una oportunidá perdida p’avanzar hacia la Escuela que queremos.

El Secretariáu de SUATEA, Uviéu a 4 de marzu de 2020

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344