SUATEA énte’l nuevu currículu d’E.I.

Esta entrada está disponible en: Castellano (Castellanu)

El Conseyu de ministros ta acabante aprobar el Real Decretu d’ordenación y Enseñances mínimes  de la Educación Infantil. Nelli establezse’l calter educativu de tola etapa (0-6), la gratuidá del segundu ciclu (3-6 años) y la progresión d’esa gratuidá pal primer ciclu de (0-3 años), priorizando l’accesu del alumnáu en riesgu de probitú y esclusión social.

A partir de les enseñances mínimes establecíes, Asturies nel exerciciu de les sos competencies, va tener que tresnar el so currículu de la Educación Infantil asturiana y el profesoráu afayalu y contestualizalu al centru educativu y a los neños y neñes que conformen el so grupu. El currículu d’Infantil va empezar a enllantase nel cursu 2022-2023.

Concretar el currículu n’Asturies obliga a respetar el marcu llexislativu anguaño esistente. L’artículu 4 del estatutu d’Autonomía  obliga a la voluntariedá del aprendizaxe. La Llei d’Usu de 1998, nel artículu 10.1 obliga a   “Nel exerciciu de les sos competencies, el Principáu d’Asturies ha garantizar l’enseñu del bable/asturianu en tolos niveles y graos, respetando sicasí la voluntariedá del so aprendimientu. De cualesquier manera, el bable/asturianu ha ser enseñáu dientro del horariu escolar y va ser consideráu como materia integrante del currículu“. Obligaciones que, tamién establez, tienen de cumplise pal gallego-asturianu. 

Sicasí, el gobiernu d’anguaño y tolos pasaos incumplieron esa obligatoriedá ensin que los currículos recoyeran nenguna referencia a les llingües d’Asturies nin a la obligatoriedá na ufierta de les sos enseñances nesta etapa. Consecuencia d’ello ye que nes escueles asturianes solo una parte minoritaria del alumnáu d’Infantil recibe clases d’estos conteníos: en dellos centros onde’l profesoráu de la especialidá d’Asturianu o Gallego-Asturianu-y “sobren” hores de les dedicaes a impartir docencia en Primaria. Siguiendo esti criteriu absolutamente economicista non solo nun se dexa acceder a estos conteníos a alumnáu nuevo, sinón qu’añu tres añu, la Conseyería Educación, vien suprimienndo la enseñanza de les nuestres llingües a alumnáu d’Educación Infantil qu’entamó la so escolarización recibiéndola. Esti ye’l casu actual del Colexu Públicu Santiago Apóstol de Mieres onde cuasi el 100% del alumnáu de 4 grupos d’Educación Infantil (EI) demandaron recibir enseñances de Llingua Asturiana y  deniégase-yos el derechu a recibiles por nun ampliar la media xornada del docente contratáu.

Cola concreción ya implantación pal cursu 2022-2023 n’Asturies  del nuevu currículu d’EI  ye menester que la Conseyería Educacación corrixa toles  irregularidaes  llegales enantes descrites. Pa ello nun tien más que recoyer nel so articuláu conteníos  referíos a les nuestres llingües y respetar la llegalidá. 

Tocántenes a la gratuidá progresiva del Primer Ciclu d’EI (0-3 años) fai referencia a lo yá establecío na disposición adicional tercera de la LOMLOE onde s’establez qu’el Gobiernu en collaboración coles alministraciones educatives tien d’ellaborar  un plan d’ocho años de duración p’algamar la gratuidá de manera qu’avance hacia “una ufierta pública suficiente y asequible con equidá y calidá”. Yá na anterior llexislatura, el Gobiernu d’Asturies, énte la demanda de SUATEA de que la xestión de 0-3 pasare directamente a la Conseyería Educación, mos retrucaba que taba estudiando la situación. Agora ye’l momentu obligáu nel que facer públicu’l plan  deriváu d’aquel estudiu. Pa SUATEA tien de cuntar colos siguientes requisitos:

  • Dotación presupuestaria abonda y esclusiva pa la rede Pública qu’acelere enforma’l procesu de la cobertoria de la demanda places.
  • Les Escueles Infantiles de 0 a 3 años tienen que tar integraes xunto con tol so personal nel sistema educativu públicu.
  • L’actual Rede d’Escueles Infantiles (mayoritariamente dependientes de los conceyos) tien que s’integrar na Conseyería d’Educación del Principáu d’Asturies con garantía del so calter públicu y gratuitu dafechu.
  • Tienen qu’establecese ratios afayadices ente’l númberu de neños y neñes y d’educadores, teniendo que s’algamar l’oxetivu “pareya educativa” en cada unidá.

N’Uviéu a 3 de febreru de 2022

Print Friendly, PDF & Email

Esta entrada está disponible en: Castellano (Castellanu)