Home > Aición sindical > SUATEA énte’l Conseyeru: El profesoráu asturianu, el peor tratáu de tol Estáu

SUATEA énte’l Conseyeru: El profesoráu asturianu, el peor tratáu de tol Estáu

SUATEA DENUNCIA ÉNTE’L CONSEYERU: El profesoráu asturianu, el peor tratáu de tol Estáu

Igual que tol personal funcionariu de l’Alministración asturiana, el profesoráu asturianu tien que tener meyoraes les condiciones llaborales y dar por acabáu’l tiempu d’aplicación de retayos n’educación.

Nel conceyu d’esta mañana col Conseyeru d’Educación, SUATEA presentó les sos propuestes y plantegó la necesidá d’afitar un calendariu de negociaciones qu’aborden los problemes más urxentes del enseñu públicu asturianu.

Hai aspectos que SUATEA esixe que s’apliquen darréu y que cuidamos básicos pa poder avanzar:

  • Ratios de alumnáu en centros educativos: Nesti cursu tán imponiendose hasta 28 alumnos y alumnes n’unidaes de Primaria por parte de l’alministración. Ye una situación que mos paez inalmisible y que nun ye bona pa facer un trabayu docente acordies cola pernecesaria atención a la diversidá. Les ratios tienen una incidencia determinante nel momentu de desenvolver una docencia con criterios pedagóxicos afechiscos pa les necesidaes queprecisa l’alumnáu. Nos últimos currículos de la nuestra comunidá anéciase na necesidá de l’atención individualizada, el desendolcar un aprendizaxe cooperativu y na aplicación de los conocimientos alquiríos a situaciones reales averaes a la contorna de los rapazos y rapacesas. Esto nun ye posible aplicando namás criterios d’aforru en personal y estruñendo a los docentes obligándolos a impartir especialidaes distintes y aumentando’l númberu d’alumnáu por aula. Poro, SUATEA esixe que nesti cursu 2015/16 nun heba nengún aula de Primaria que perpase los 25 alumnos/es. Nun supón más que cumplir la llei y dexase d’interpretaciones retorcíes pa saltar perriba la norma. Tien que ser el primer pasu para reducir enforma’l númberu d’alumnaes y alumnos en tolos niveles educativos.
  • Horarios del profesoráu de Secundaria: Tres d’un estudiu ellaboráu por SUATEA a nivel estatal, constatamos que n’Asturies el profesoráu de Secundaria tien la mayor carga llectiva del Estáu. Esti estudiu refierse concretamente al númberu de sesiones que’l profesoráu dedica al Centru. De les 37.5 hores de xornada llaboral, la permanencia nel centru del profesoráu de Secundaria en’Asturies ye de 29 sesiones. Sicasí, después de los retayos impuestos por Rajoy en 2012, la mayoría de les Comunidaes quedaron ente 23 (Euskadi y Galicia) y 25 hores de permanencia nel centru. Namás unes poques comunidaes gobernaes pol PP (Madrid, Murcia y Castilla la Mancha) incrementaron la carga horaria selmanal hasta 28 sesiones. D’esto deducimos que’l profesoráu asturianu tien peores condiciones incluso qu’estes comunidaes gobernaes pol PP, porque nun hai una sola na que la permanencia nel centru educativu seya de 29 sesiones. A les clares se ve qu’esto afecta a les condiciones llaborales del profesoráu y a la forma de facer el so trabayu, pues, amás de les hores de permanencia nell centru, el profesoráu tien que preparar les clases, correxir actividaes y exámenes y recibir la formación amañosa pa exercer la so profesión. Por too ello, afirmamos que’l profesoráu asturianu tien les peores condiciones llaborales del Estáu y exiximos que se meyoren darréu con midíes concretes.

(AXÚNTAE ABAXO CUADRU DE COMPARANZA DE LA SITUACIÓN NES DIFERENTES COMUNIDAES)

  • PROFESORÁU INTERÍN Y OPOSICIONES. La tasa de profesoráu interín medró nestos últimos años n’Asturies, hasta llegar yá a cerca del 30% de la plantiya docente. La causa d’esta altísima tasa d’interinidá ta en que les ufiertes d’emplegu docente n’Asturias fueron mui bien escases. Por esta razón, ye preciso reducir la tasa de profesoráu interín cola convocatoria d’ufierta pública d’emplegu docente abondo pa reducir esta alta tasa de interinidá. De toles maneres preocúpanos que l’actual sistema d’accesu a la función pública docente nun valora la práctica docente como principiu, que ye lo que’l profesoráu interín aporta como puntu fuerte, y el baremu que s’aplica tampoco nun valora de forma afayadiza la esperiencia docente. Ye por esto que, dende SUATEA, proponemos qu’habríen de dir xuntes la convocatoria d’oposiciones y la negociación d’un nuevu Alcuerdu de profesoráu interiín que-y dea estabilidá al que, acreditando esperiencia docente, nun obtengan plaza, pues, si non, vamos atopanos cpn cientos o miles d’interinos despedíos. Y ye que, tamién nesti sen, el profesoráu asturianu ta n’inferioridá de condiciones respecto al profesoráu interín d’otros territorios (Cantabria, Galicia, Euskadi, Andalucía, etc.), onde tienen pautos d’estabilidá pal colectivu.

Por todo ello, SUATEA pide la convocatoria d’ufierta d’emplegu públicu que cubra dafechu tola tasa de reposición y que s’abra la negociación d’un nuevu Alcuerdu pa profesoráu interín que recueya estos aspectos: ellaboración de llistes nes que prime la esperiencia docente; la estabilidá nel emplegu pa los que tán trabayando agora; la desvinculación de les llistes y la obligación de presentase a oposiciones; contratu indefiníu pa mayores de 55 años, integración en llistes y reconocencia de los derechos de les persones afectaes por discapacidá y equiparación al profesoráu funcionario en tolos aspectos.

  • Amás d’estes cuestiones espuestes y qu’en SUATEA cuidamos que se tienen qu’atayar darréu, tamién presentamos otros aspectos que deben de negociase a lo llargo del cursu:

– Paralización LOMCE y reválides: ye preciso un compromisu de la conseyería pa tornar la celebración de les reválides de 3º y 6º de primaria. Hai que-y dar respuesta al alumnáu que ta anguaño na FP básica o nos PMAR pa que seya quien a sacar el títulu de graduáu n’ESO. Tien que se dar respuesta a los centros énte les dudes que trae la implantación de le Llei.

– Dotación de personal non docente a los centros p’atender les nueves necesidaes: xestión de llibros de testo, l’atención a la salú escolar (derogación de les normatives impuestes el cursu pasáu), comedores escolares, tresporte escolar, servicios sociales, etc.

– Integración na rede pública de la etapa d’Educación infantil de 0 a 3 años, incluyendo el treslláu de la xestión del personal y de les escueles existentes agora y la meyora de les sos condiciones llaborales.

– Calendariu escolar pal cursu 2016-17.

– Regulación normativa específica pa los conservatorios de música y que tea en vigor el cursu que vien.

– Reducción de xornada pa mayores de 55 (tal como contempla la LOE), ensin disminución de retribuciones y compromisu d’estabilidá pal profesoráu interín mayor de 55.

– Oficialidá de la Llingua asturiana y creación inmediata de la especialidá.

                      Uviéu, 6 de ochobre de 2015.

 

COMPARANZA DE LA SITUACIÓN NES DIFERENTES COMUNIDAES

SESIONES
TERRITORIU * PERIODOS 55′ XORNADA LLABORAL NON PERMANENCIA PERIODICIDÁ VARIABLE PERMANENCIA LLECTIVES COMPLEM.
ANDALUCÍA NO 37,5 7,5 5 25 20 5
ASTURIES SI 37,5 7,5 1 29 20 9
CANARIES NO 37,5 8 3,5 26 20 6
CASTILLA-LA MANCHA NO 37,5 8,5 3 26 21 5
CASTILLA Y LLEÓN NO 37,5 7,5 5 25 20 5
ESTREMADURA NO 37,5 7,5 5 25 20 5
GALICIA NO 37,5 7,5 7 23 20 3
MADRID NO 37,5 7,5 2 28 20 8
MURCIA SI 37,5 6,5 3 28 20 8
LA RIOJA NO 37,5 8,5 4 25 20 5
PAÍS VALENCIÀ NO 37,5 7,5 5 25 20 5
EUSKAL HERRIA NO 37,5 7,5 7 23 17 6
NAVARRA NO 37,5 7,5 5 25 20 5
CATALUNYA NO 37,5 7,5 2 28 20 8

 

* En Baleares ta acabante de firmase un alcuerdo pol que se va reducir l’horariu llectivu a 19 sesiones el cursu que vién y 18 nel siguiente.

 

 

 

 

 

 

 

 

 

 

 

 

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743