Home > Comunicaos > SUATEA énte les propuestes del ministru Iceta sobre la estabilidá del prof. interino

SUATEA énte les propuestes del ministru Iceta sobre la estabilidá del prof. interino

Destaquen los aspeutos relativos a l’alta temporalidá del empléu nes Alministraciones Públiques y les propuestes al respectu que dexó entever.

Ayeri, 18 de marzu, el Ministru de Política Territorial y Función Pública, Miquel Iceta, realizó una esperada intervención na Comisión Parlamentaria del Congresu. Les entrugues ya intervenciones más recurrentes de prácticamente tolos diputaos y diputaes presentes na comisión xiraron en redol al abusu de la temporalidá nes Alministraciones Públiques.

De la so intervención paez esprendese l’oxetivu d’esaniciar les altes tases de temporalidá nel sector públicu, pero les acciones que propón xenérennos bastante incertidume y déxanos un sabor amarguxu.

Xenéranos della esperanza l’anunciu de la busca d’una solución pa estabilizar al personal interino que tuvo trabayando n’abusu de temporalidá mientres años y décades. Les Alministraciones Públiques, incluyida la Conseyería d’Educación d’Asturies, utilizaron la fórmula de contratar a personal interino, non pa resolver cuestiones temporales, puntuales y urxentes, como dexa la normativa, sinón pa cubrir puestos y vacantes permanentes y estructurales.

Xenéranos   tamién della esperanza que manifieste la so preferencia por suprimir les pruebes eliminatories nos procesos selectivos, que son por concursu oposición. Anque esti nun ye’l nuesu modelu d’accesu a la función pública docente, consideramos que suprimir pruebes eliminatories ameyoraría en dos sentíos: valorar afechiscamente y nel so conxuntu la valía de cada aspirante, incluyida la so competencia pedagóxica (agora ye la última prueba) y, amás, dexa llograr una nota más ecuánime y global a la fin del procesu.

Pero, pela contra, cáusanos esmolición qu’anuncie como midida sancionadora que si una Alministración nun termina de sacar nes sos OPES una plaza estructural, dempués d’un tiempu determináu de tar ocupada interinamente, esa plaza va suprimise. Y preguntamos ¿A quién sanciona esta midida? ¿A l’alministración o a la persona trabayadora qu’ocupa la plaza?

De la mesma cáusanos igualmente esmolición les referencies al Alcuerdu de Estabilización soscritu en 2017 ente’l ministru Montoro y les organizaciones sindicales CSIF, CCOO y UXT, pues esi Alcuerdu nun plantega como solución estabilizar a la persona que lleva 20 años ocupando un puestu de trabayu, sinón convocar les places a oposición anque ello traiga’l despidu de les persones que les ocupen.

Rescampla que nun ye lo mesmo estabilizar un puestu de trabayu qu’estabilizar al trabayador o trabayadora que la desempeña. Ye necesario consolidar nos sos puestos de trabayu al personal que lleva 15, 20, 30 años n’abusu de temporalidá, fechu reconcíu pol Tribunal de Xusticia de la Unión Europea.

N’otru orde de coses, la coxuntura actual tocántenes al personal interino esixe que l’Alministración educativa asturiana dea soluciones al colectivu y encamentámos a la Conseyería a que denuncie de forma inmediata l’Alcuerdu d’interinidá porque nun s’afái a derechu.

Secretariáu de SUATEA
Uviéu, a 19 de marzu de 2021

Esta entrada también está disponible en: Castellanu