Home > Aición sindical > SUATEA énte l’aprobación los PXE 2018

SUATEA énte l’aprobación los PXE 2018

SUATEA ÉNTE L’APROBACIÓN LOS PXE 2018

LA CONSEYERÍA D’EDUCACIÓN QUEDA ENSIN SIDA

presupuestosL’aprobación de los Presupuestos Xenerales del Estáu (PXE) pal añu 2018, cuando tamos yá a metá d’elli, ta siendo celebrada nos medios de comunicación como una gran noticia que vien confirmar la bona salú del réxime del 78 magar los resquiebros surdíos de resultes los efectos de la crisis económica que mos tiñaza.

Frente a los discursos optimistes basaos en datos macroeconómicos espublizaos dende les esferes gubernamentales, la realidá dirá demostrándonos cuánto hai de verdá nesa afirmación y cuánto de propaganda procedente d’un gobiernu marcáu pola corrupción y la incapacidá pa tomar decisiones que dexen salir de les llamuergues que tenemos per delantre.

Lo que sí ta claro ye que n’Asturies, el Conseyeru d’Educación Genaro Alonso, supeditara la reversión de los retayos (sobremanera la vuelta tras nel aumentu del horariu lectivu del profesoráu asturianu) a l’aprobación de los PXE.

A lo llargo del cursu asistimos a una montonera movilizaciones protagonizaes por un colectivu docente qu’aportuna na necesidá de recuperar les condiciones llaborales esistentes antes del entamu de la crisis. La imposición de les dos hores llectives ta esbarrumbando tanto les condiciones de trabayu como la calidá educativa. L’aumentu de les ratios d’alumnáu, l’amenorgamientu de recursos dedicaos a l’atención a la diversidá, el zarru d’unidaes escolares, la precarización de los contratos cola xeneralización de les medies xornaes o l’aumentu de les hores llectives pal profesoráu, la falta de profesoráu de sofitu y la non cobertoria de sustituciones fai que’l profesoráu apenes tenga tiempu pa desempeñar les sos innumberables xeres.

Nestes últimes selmanes tamos asistiendo a una medría de los trabayos burocráticos nos centros cola aplicación de diverses evaluaciones y programes que se cubren con un trabayu estra: pruebes diagnósticu (reválides), programa Talis, programa Pisa, exames d’accesu a ciclos formativos, ente otros. Si a esto añedimos la medría de trabayu que significa’l final de cursu atopamos con un cuerpu docente aforfugáu.

A too ello hai qu’añedir el problema del profesoráu interino que la so situación foi denunciada por SUATEA cola recién fuelga del pasáu mes d’abril.

El Conseyeru d’Educación y el Gobiernu asturianu tienen na so mano agora la recuperación de les condiciones llaborales del profesoráu, pa lo que tien de faer lo necesario pa incluyir nes instrucciones d’empiezu de cursu l’amenorgamientu del horariu llectivu pa tol profesoráu contabilizando les guardies como horariu llectivu, dotando a los centros d’Infantil y Primaria de profesoráu tutor y del profesoráu d’apoyu necesario pa garantizar una enseñanza de calidá.

Nun hai sides nes qu’escudase: agora ye’l momentu de dar el pasu que tol profesoráu de la enseñanza pública espera dende hai yá demasiaos años. Una reivindicación que, de perfacese, va dar en beneficiu del alumnáu y del sistema públicu d’educación.

N’Uviéu, a 28 de mayu de 2018

Secretariáu de SUATEA

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3778

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3778