SUATEA escontra la última campaña de HazteOír

Educar vs adoctrinar

La semana pasada  dellos diversos centros d’enseñanza asturianos recibieron el material unviáu pola asociación integrista HazteOír nos que se presenta la so campaña de supuesta protección a los menores de la campaña “d’adoctrinamientu n’ideoloxía de xéneru”. Con anterioridá, dellos medios de comunicación fixérense ecu d’ella y señalaben que, na so documentación, HO denuncia que, nel casu asturianu, esisten centros nos que s’imparten charres, talleres y cursos  al cargu d’organizaciones LGTBI

En SUATEA recibimos diverses llamaes nes que se nos entrugaben cuestiones sobre la orientación de dichos materiales y el so dudosu encaxe dientro de l’actual llegalidá educativa. Por too esto, creemos que tenemos de facer una serie de reflexones al respective.

La documentación de HO encamienta a les families a solicitar un “Pin parental” que lliteralmente dicen “garantiza a los padres el derechu a educar a los sos fíos ensin adoctrinamientu afeutivu-sexual nes aules”, tamién falen “d’adoctrinamiento de xéneru”. Énte esta inxerencia y ataque a la enseñanza per parte d’elementos reaccionarios de la estrema derecha, paez que-yos tenemos que recordar delles cuestiones: La educación pa la igualdá y pal respetu a la diversidá ye obligatoria por llei, hai delles lleis orgániques d’obligáu cumplimientu a nivel estatal qu’asina lo axusten:

•             Llei orgánica 1/2004, de 28 d’avientu, de Midíes de Protección Integral contra la Violencia de Xéneru.

•             Llei orgánica 3/2007, de 22 de marzu, pa la igualdá efectiva de muyeres y homes.

•             Llei Orgánica 8/2013, de 9 d’avientu, pa la meyora de la calidá educativa.

Amás d’estes lleis estatales, el profesoráu tamién se debe a la obligatoriedá d’educar pa la igualdá y pal respetu a la diversidá n’Asturies: Llei del Principáu d’Asturies 2/2011, de 11 de marzu, pa la igualdá de muyeres y homes y al desaniciu de la violencia de xéneru.

Polo tanto, el nuesu deber como docentes ye cumplir les lleis que directamente nos obliguen, como docentes nun Estáu de Derechu, tar a espenses de lo qu’opinen les families, como propón esta asociación, pa facer un currículu a midida de la so ideoloxía que, amás d’ignorar les lleis paez qu’encamienten a incumpliles.

1. La educación pa la igualdá y pal respetu a la diversidá nun significa adoctrinar. De fechu, fuxe precisamente del adoctrinamientu al que nos tienen avezaos y avezaes otros sectores sociales y relixosos. HazteOír quiciabes nun entiende bien la palabra “adoctrinar”, que significa esponer una doctrina pa ganar adeptos y caracterízase por presentar un solu camín posible na vida y tolo que se sala del caminín marcáu o ta mal o ye pecáu. Al contrario, “educar” supón enseñar que na vida hai bayura de caminos distintos pa ser una persona democrática, igualitaria y xusta y preténdese que sía l’alumnáu’l quien, con espíritu críticu, decida’l so propiu camín a siguir, siempres  coles mires d’ameyorar esta sociedá que tien tantes faltes.

Na Escuela Pública nun tenemos catecismos, nin esiste l’infiernu (bonu sí, l’infiernu de los retayos qu’atrabanquen el nuesu llabor). La Escuela Pública educa pa la convivencia y pa la democracia. Quien falen de qu’adoctrinamos en “ideoloxía de xéneru” tienen la intención de semar el mieu ente’l profesoráu y l’alumnáu. Aconseyámos-yos que llean un poco primero de escribir panfletos.

2-            Una parte del nuesu alumnáu tien, na Escuela Pública, la única oportunidá d’escuchar mensaxes a favor de la igualdá ente homes y muyeres y a favor del respetu a toles persones, ensin importar la so condición de nacencia nin la so evolución na vida. Poro, la Escuela Pública realiza un llabor ponderatible d’equilibriu nesta sociedá na que la educación familiar en dellos casos o bien relluma pola so ausencia o bien s’enconta en preceutos alloñaos de la democracia y de la Declaración de los Derechos Humanos.

Sabemos qu’estos grupos reaccionarios son una minoría, pero polo visto tienen tolos medios económicos (de los que, precisamente anda escosa la Escuela Pública) pa estender el so mensaxe d’odiu a tolos llugares. Yá lo intentaron primero cola campaña contra l’asignatura d’Educación pa la Ciudadanía. La so estratexa, como siempres fai la ultraderecha, ye semar la inseguridá y el mieu nel profesoráu pa que nun atreva a facer realidá la educación pa la igualdá y pal respetu a la diversidá. Provoquen mieu pa paralizar la enseñanza nos valores universales que marquen los organismos internacionales, les persones espertes n’educación y nueses mesmes lleis.

Por eso, dende SUATEA, pidimos a les autoridaes educatives que dean instrucciones pa que se retiren de manera urxente esos panfletos de los centros educativos públicos asturianos. La Escuela Pública ye la balanza que permedia un mundu desigual, ye una ventana al futuru, non al pasáu, ye’l foru onde’l nuesu alumnáu apriende a ser persona del sieglu XXI.

La nuesa escuela va siguir trabayando contra la homofobia, contra la tresfobia, contra les discriminaciones por xéneru. La nuesa escuela va siguir enseñando espíritu críticu, democracia, igualdá y respetu. Yá ta bien de panfletos llenos d’oscurantismu y ataque a les nueses lleis.

                                                                                              Uviéu/ Uviéu 30 de setiembre 2019