SUATEA encamienta a Educación a recurrir les sentencies sobre la enseñanza de la relixón.

SUATEA amuesa la so esmolición ante les sentencies qu’almiten parcialmente les demandes del Arzobispáu y del sindicatu ANPE. En diches sentencies declárense nulos los horarios correspondientes a les enseñances de relixón conteníos nos anexos correspondientes a los desenvolvimientos de la LOMCE n’Asturies. La causa fundamental de les mesmes son nel casu de primeru de Bachilleratu, la falta d’una asignatura alternativa como sí esiste na ESO y nel de Primaria, la considerancia de que la ufierta de relixón nun se fai de forma equiparable al restu de materies, como marquen los Alcuerdos cola Santa See de 1973.

Qu’esto sía posible en 2015, esto ye, qu’un alcuerdu de dómina preconstitucional siga rixendo les nueses vides en plenu sieglu XXI paez incomprensible y fuera sitiu. Lo más chocante del casu ye que la publicación d’estes sentencies coincida nel tiempu cola presentación del programa electoral del PSOE nel que se compromete a derogar los tristemente famosos Alcuerdos cola Santa See y a sacar la relixón de la escuela. Lo murnio ye qu’esta decisión tendría d’habese tomao por esti partíu cuando s’atopaba nel gobiernu, nun fai tantu tiempu.

Pero hai otros elementos interesaos en toa esta cuestión como qu’haya sindicatos que se dediquen a defender los privilexos de la Ilesia Católica frente a los de la inmensa mayoría del profesoráu a quien, de cumplise esta sentencia, vería perxudicaos los sos horarios y enseñances pol aumentu de la carga lectiva en relixón.

SUATEA esixe a tolos partíos políticos que se presenten a les próximes elecciones que d’una vegada por toes anulen los Alcuerdos cola Santa See, pongan la relixón nel ámbitu que-y correspuende, esto ye, na esfera de lo privao, y torguen que sentencies como estes puedan volver producise.

Per otra parte, SUATEA encamienta a la Conseyería d’Educación d’Asturies a recurrir en casación les dos sentencies, qu’aplacen l’aplicación de la LOMCE y que trabaye cola mayoría de la comunidá educativa asturiana pa torgar los estragos qu’una Llei como ésta ta yá causando nos centros educativos asturianos.

Uvíeu, 21 d’ochobre de 2015

Secretariáu de SUATEA