Entamu de cursu anormal dafechu

Un añu más l’entamu de cursu n’Asturies carauterízase pola apaición d’una serie d’anormalidaes. Sicasí, el Sr. Conseyeru salió en delles ocasiones nos  medios de comunicación señalando “la normalidá absoluta” cola que s’empecipiaron l’actividá escolar, daqué que nun ta d’acuerdu col ensame de llamaes que nos primeros díes recibimos  dende los centros pa informanos de la esistencia d’un númberu significativu de places ensin cubrir en cada unu d’ellos. En bona parte de los centros  falten ente cinco y diez profesores, esistiendo casos estremos onde la cifra de places ensin cubrir ye tovía mayor.

Como en cursos anteriores esti problema ye consecuencia d’una política que se repite añu tres añu y que consiste en nun sacar toles places vacantes na primer axudicación. En concreto, nesta segunda axudicación  vemos dellos datos que nos paecen relevantes como que de toles places que s’ufierten son 879 de les que 390 son vacantes. Na primer convocatoria de 30 d’agostu ufiertáronse 2622 en total,  la ufierta d’esta 2ª convocatoria equival al 33% de les convocaes na anterior. Les places que salen a media xornada son 221 (135 de primaria) que vienen a ser el 25% de les 879 totales nesta ocasión.
Unu de los aspeutos más llamativos ye la esistencia d’una serie de vacantes a tiempu completu con un númberu significativu como pueden ser los casos d’Inglés, 15 vacantes completes o Xeografía y Hestoria con 13 places. Son vacantes completes que nun s’ufiertaron nuna primer convocatoria y que nos paez difícil que surdieren de la nada. Amás, puede añadese al respeutive un datu importante, que ye la localización xeográfica d’estes places, yá que na so inmensa mayoría son destinos allugaos nes grandes ciudaes del centru asturianu (Uviéu, Xixón, Avilés) lo que nos fai pensar que la Conseyería xuega con eses places que s’ufierten según  criterios desconocíos.

Tamos recibiendo información desde dellos centros que denuncien que quedaron ensin axudicar una serie de places correspondientes a la Formación Profesional Básica (F.P.B.) que tien previstu l’entamu  de cursu pal próximu 25 de setiembre. Nun dexa de ser llamentable que la Admon.  sea allabanciosa falando de calidá educativa y d’amenorgamientu del fracasu escolar, mientres dexa albentestate al alumnáu de F.P.B. qu’axunta unes característiques bien precises, al borde del abandonu del sistema educativu.

Esta falta va afeutar ensin dulda al funcionamientu de los centros con grupos completos ensin profesoráu, más guardies pal profesoráu por citar dellos exemplos. Cuéstanos entender esti aspeutu. Nun sabemos bien si tien orixe en criterios d’aforru económicu inducíu pola política de retayos  pola irresponsabilidá d’una Admon. que, magar tienr estos dendel branu, nun foi capaz de planificar les necesidaes correspondientes a cada centru pa dotalos de  profesoráu.

Otres denuncies que recibimos son de casos  como  centros que piden una sustitución por baxa llaboral y l’Alministración fai’l correspondiente “afaitáu” menguando la ufierta a media plaza, fechu grave de por sí  pero mayor tovía si s’aplica a profesoráu dedicáu a l’atención a la diversidá.
Hai que ser conscientes de lo que signifiquen estos datos na vida diaria de cada centru. Plantiyes incompletes, alumnáu ensin el profesoráu que-y correspuende y, en dalgunos casos ensin la presencia nel entamu del cursu del tutor o tutora del grupu al que tán asignaos. Esto tamién  implica que dende’l primer día hai guardies que recayen  nel llombu  del profesoráu fixu de cada centru dando continuidá asina a la creciente carga lectiva de los últimos años. Nun podemos considerar normal un entamu de cursu marcáu por un problema que paez tener enclín a convertise n’irresoluble.
Esta política tamién afeuta  al profesoráu interín na midida na que d’esta segunda convocatoria puede sacase la conclusión de qu’hai munches vacantes que podíen axudicase na primera. Nun facelo obliga a dellos profesores interinos  a decidise por places que pueden ser contraries a los sos intereses. Esto trai desaxustes ya inxusticies nel orde de prelación de los aspirantes,  munchos fueron destinaos a puestos más alloñaos o a media xornada que los que van poder llograr persones que tán muncho más embaxo nes llistes. Dende SUATEA repetimos que ye  menester que se convoquen toles vacantes na primer convocatoria o que se dexen opciones como la “meyora de puestu” que yá s’apliquen dende va tiempu n’otres CCAA.
La cifra de profesoráu interín algama proporciones  preocupantes pero aínda ye mayor l’aumentu de personal que va tener que trabayar esti cursu a media xornada colo qu’eso supón, tanto pa les condiciones llaborales del profesoráu como pal desenvolvimientu de la so actividá educativa nos centros.

El secretaríau de SUATEA

N’Uviéu a 19 setiembre de 2017