SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
Ayeri llunes, 13 d’abril, el profesoráu y l’alumnáu volvieron a l’actividá docente. Nun entendemos que l’Alministración educativa nun resolviera los supuestos problemes téunicos pa retomar esta mesma selmana les convocatories y axudicaciones pa sustituyir al profesoráu que ta de baxa por enfermedá o qu’aportara a la xubilación.
En xunta celebrada güei, 14 d’abril, la Conseyería informa que ta estudiando cubrir les necesidaes imprescindibles pa l’atención al alumnáu. Tamién, comunica que dende la segunda selmana del confinamientu casi nun hubo solicitúes de los centros educativos pa sustitución del profesoráu, ello ye que dase la cifra de 100 reincorporaciones de profesoráu a la so plaza y de una única solicitú de sustitución per parte de los centros educativos.
Dende SUATEA ponemos en dulda la información que mos dio l’Alministración porque mos consta qu’hubo baxes por enfermedá y xubilaciones, asina que reclamamos que se retomen yá les convocatories y axudicaciones del profesoráu interino sustituto pa facer posible una respuesta docente afayadiza al alumnáu. Tol profesoráu ye agora más que nunca necesario pa poder acompañar al alumnáu nesti procesu educativu anómalu y pal que naide nun taba preparáu.
Amás de los derechos del alumnáu, esmolécennos tamién los derechos llaborales del profesoráu que tendría de facer les sustituciones, pos nun va poder trabayar y va sufrir perda de derechos, como’l cobru del branu, prórroga de contratu, etc.
Per otra parte, na xunta de güei, manifestemos la nuesa protesta pola xunta que l’Alministración celebró ayeri, 13 d’abril, por videoconferencia namás con ANPE y UGT pa tratar el problema de sustituciones, xusto un día primero que se celebrara la xunta con toles OOSS de la Xunta de Personal Docente. Ye una obligación de l’Alministración responder a les necesidaes y urxencies del sistema educativu, ente elles les sustituciones del profesoráu, y toles Organizaciones Sindicales tamos lexitimaes pa tar informaes y p’esixir rempuestes. Dende SUATEA, consideramos illegal qu’estos sindicatos s’atribuyan el derechu a información privilexada y a la negociación n’esclusiva y que l’Alministración-yos siga’l xuegu celebrando esa xunta. Énte actuaciones tan graves, vamos estudiar entamar acciones llegales por favorecer a estos sindicatos frente al restu.
UVIÉU, 14 d’abril de 2020
Esta entrada está disponible en: Castellano (Castellanu)
