SUATEA denuncia la ineficiente xestión económica del Principáu na doble rede.

SUATEA DENUNCIA LA INEFICIENTE XESTIÓN ECONÓMICA DEL PRINCIPÁU NA DOBLE REDE EDUCATIVA

Más del 70% de les unidaes concertaes nes Cuenques Mineres tán siendo subvencionaes ensin necesidá. L’alumnáu podría ser asumíu polos centros públicos esistentes ensin aumentar la financiación, lo que supondría un aforru d’unos 24 millones d’euros.

SUATEA sostien qu’esti repagu torga la sostenibilidá económica del sistema educativu al mediu plazu.

Dende SUATEA, n’analizando los datos que salen de les comisiones d’escolarización y los presupuestos xenerales del Principáu, topemos que se ta faciendo una xestión tremendamente ineficiente de los recursos públicos.

Concretamente, reparemos qu’ente la Cuenca del Nalón y la del Caudal vienen concertándose 79 unidaes ente primaria y ESO que nun son necesaries, yá qu’esi alumnáu entra bien dientro de les unidaes anguaño esistentes nos centros públicos, ensin necesidá d’ampliar unidaes, construyir nuevos espacios nin de contratar más profesoráu, esto ye, a costu cero. Esto significa que gastóse dineru público en caltener personal y infraestructures de centros de titularidá privada cuando nun facía falta nenguna.

SUATEA realizó esti análisis conceyu a conceyu, a partir de los datos de les comisiones d’escolarización territoriales a les que’l sindicatu tuvo accesu, llográndose los datos que s’amuesen na tabla siguiente:

Fonte: SUATEA, a partir de datos llograos de les comisiones d’escolarización.

Amás de lo llamativo que resulta ver qu’en Llangréu hai más unidaes na concertada que na pública, podemos ver que, en total, de les 109 unidaes concertaes ente dambes Cuenques, 79 tán siendo financiaes innecesariamente, esto ye, un 72% de les unidaes concertaes tán siendo financiaes ensin necesidá, pos l’alumnáu tendría plaza na pública ensin aumentar costos. Tamos pagando pol mesmu serviciu dos veces. Pagamos unidaes na pública que queden ensin enllenar, y depués pagamos unidaes na rede de centros privaos sosteníos con fondos públicos pa escolarizar alumnáu que tien sitiu abondu na rede pública. Ye un marafundiu de fondos públicos que va poner en riesgu la estabilidá del sistema educativu al mediu plazu. Porque que los servicios públicos tengan de ser de baldre y nun han de tar suxetos al criteriu de rentabilidá nun significa que nun tengan que rixise polos principios d’eficiencia económica y ser sostenibles nel tiempu, y pa ello, la planificación económica de los servicios públicos ha de facese atendiendo a criterios de racionalidá económica. Nun ye racional nin sostenible gastar perres en 79 unidaes que nun faen falta. A partir de los datos publicaos nos presupuestos xenerales, pudimos calcular una cifra pa esti marafundiu de recursos públicos: 24 millones d’euros aprosimao, en 6 años.

Denunciamos esta situación agora, pos ye’l momentu nel que l’alministración educativa ta anovando los conciertos y esperamos que’l Gobiernu nun decida mirar pa otru llau y nun tener en cuenta estes cifres.