SUATEA convocará movilizaciones si s’obliga a pidir a ciegues al profesoráu interín

La Conseyería d’Educación sigue col so acosu al profesoráu interín. Dempués d’un cursu d’enfrentamientos constantes con estos docentes, agora la Conseyera xenera otra fonte de conflictu pretendiendo camudar el sistema de pidimientu y les axudicaciones de vacantes pal próximu cursu.

Dende l’Alministración preténdese que les solicitúes se faigan ensin conocer primeramente los puestos que s’ufierten. Esti sistema de “pidir a ciegues” pue xenerar situaciones d’inxusticia y agraviu comparativu ente los aspirantes a interinidá. Nun conocer en qué centros va haber places nin les sos característiques implica escaecer la complexidá de casuístiques que se puen dar.

Los puestos puen ser vacantes pa tol cursu o sustituciones pa tiempu determináu, paralelamente caún d’ellos pue ser a xornada completa o media xornada y, por si fora poco, hai qu’incluyir otra variante, el que la plaza sía itinerante o non.

Depués de la nefasta esperiencia del cursu pasáu colos fallos na aplicación informática que dexó nel paru a un grupu de profesores pidimos que los cambeos que se fagan consistan en xenerar un sistema que dexe pidir conociendo los perfiles de los puestos y qu’incluya la propuesta de SUATEA de “meyora de plaza” pa respetar hasta’l final del procesu l’orde de prelación y la total tresparencia del mesmu.

Dende SUATEA manifestémonos en contra d’estos cambeos y, si la Conseyería nun depón la so actitú, verémosnos obligaos otra vuelta a convocar movilizaciones. Preséntasenos un final de cursu movíu, colos interinos ya interines cuestionando de nuevo la política que la Conseyera Ana González ta aplicando de forma unillateral.

Los criterios que s’apliquen polo xeneral pa la xestión del los y les aspirantes a interinidá tán llenos d’incongruencies. Por poner un exemplu: tres l’alcuerdu robláu apocayá por delles organizaciones sindicales, en delles especialidaes oxetu de convocatoria d’oposiciones, danse agravios comparativos ente quien pertenecen a llistes o tán en bolses, circunstancia totalmente arbitraria y responsabilidá esclusiva de l’alministración, que va obligar a precisar más nota a unos qu’a otros pa poder tener puntuación pol procesu selectivu.

Ye necesariu poner frenu a toes estes arbitrariedaes y esixir a la Conseyera qu’ellabore polítiques que respeten la profesionalidá d’estos docentes, que se valore la so contribución y se tenga en cuenta que los bonos resultaos llograos pol alumnáu, a los qu’a la Sra. Ana González-y gusta tanto espublizar, son debíos tamién al so esfuerzu y compromisu col sistema públicu educativu asturianu.

Uviéu, 22 de mayu de 2014