SUATEA convoca movilizaciones n’oposición a la ufierta d’empléu públicu

Faise un llamamientu al colectivu de profesoráu interín pa que faiga públicu’l so refugu

Dende la Conseyería d’Educación paecen siguir col enfotu de caltener la risible ufierta d’empléu públicu anunciada la otra selmana. Énte tala falta de respetu pol colectivu interín SUATEA promueve nos centros educativos asturianos la celebración d’asamblees y concentraciones nos que’l profesoráu puea manifestar el so refugu a la convocatoria.Estes acciones, que van desendolcase dende’l miércoles de la próxima selmana, tienen como oxetu denunciar:

• La incertidume na que s’atopa esti colectivu dende va dellos meses, con declaraciones de la Conseyera que diben camudando de dirección y condicionando la ufierta d’empléu al desarrollu de la LOMCE o a l’aprobación de los próximos presupuestos.
• El perxuiciu del “efectu llamada” cuando nun hai convocatoria n’otres CCAA y el profesoráu tien que competir con miles d’aspirantes d’otros llugares ensin que se-yos reconoza méritu específicu dalu por desenvolver la so esperiencia docente n’Asturies, cosa qu’asocede n’otros territorios.
• La burlla que supón una cifra de 14 places que nun sirve más que pa provocar una rotación nel empléu y que nun estabiliza n’absoluto una plantiya con más d’un 20% d’interinidá.
• La esmolición polo que va suponer el financiamientu d’esta convocatoria que xira alredor del millón d’euros (que nun ta prevista tres la prórroga presupuestaria na nuesa Comunidá) y que se fai nun contestu de retayos nes contrataciones y de xeneralización de les medies xornaes.

El llamáu contempla la realización d’asamblees que se fadrán nos recreos o a la fin de la xornada según el centru y nos que van ellaborase manifiestos que recueyan el sofitu de tol profesoráu. Tamién la realización de concentraciones nos patios o a la entrada de los centros y la realización de fotografíes que van espublizase a los medios al otru día.

Ye esti l’últimu recursu que nos dexen dende la Conseyería d’Educación énte decisiones que nun tienen en cuenta la realidá y necesidaes del colectivu, que nun favorecen n’absoluto la calidá d’enseñanza y que van amás en contra del criteriu de los sos representantes sindicales.
Uviéu 17 de xineru de 2014