Home > Comunicaos > SUATEA contra la esplotación sexual

SUATEA contra la esplotación sexual

23s_noexplotacionsexual_Güei, 23 de setiembre, Día Internacional Contra la Esplotación Sexual, recordamos que más de cuatro millones de muyeres y menores son traficaes y destinaes al mercáu del sexu cada añu. Esta esclavitú esiste porque hai demanda de prostitución. Faemos un llamamientu a los homes “consumidores” de prostitución, responsables directos de la situación d’estes víctimes.

Según la Declaración Universal de los Derechos Humanos naide va tar sometíu a esclavitú nin servidume. La esclavitú y el tráficu d’esclavos tán prohibíos en toles sos formes. Asina y too, cada añu cuatro millones de muyeres y neñes son víctimes de la esplotación sexual.  Según fontes oficiales, el noventa y cinco per cientu de les víctimes d’esplotación sexual son muyeres y neñes. Sometíes a una esclavitú fuxendo de conflictos armaos, de miseria y violencia, captaes poles redes mafioses y destinaes al codalosu negociu de la prostitución. Un negociu pa los proxenetes y prostituidores; violencia y miseria pa les muyeres prostituyíes.

Esiximos de los gobiernos que cumplan los sos compromisos adquiríos nos protocolos y lexislación nacional y los derivaos del derechu internacional. Que nun antepongan les polítiques d’axuste y retayos presupuestarios al guarecimientu de la integridá física de les víctimes de trata pa la esplotación sexual, en condiciones d’esclavitú y ensin nengún respetu a los derechos humanos.

Fai falta voluntá política pa esaniciar la esplotación sexual, dotando de los recursos afayadizos pa dar asistencia y protección integral a les víctimes, pal so arreglu y reinxertu social.  L’interés de les alministraciones nun pue centrase na persecución de les persones indocumentaes, sinón nos delincuentes que trafiquen, criminales qu’actúen impunemente y que ganen millones a cuenta d’acabar cola vida de seres humanos. Nun ye sexu de lluxu: ye esplotación, violencia, tortura, secuestru, esclavitú.

La llucha contra esta esclavitú pasa per cambiar el modelu de sexualidá, per una educación afectivo-sexual alloñada del modelu heteropatriarcal, en relaciones igualitaries basaes nel respetu a la diversidá.

Nun queremos que los nuesos fíos sían mañana consumidores de prostitución y contribuyan  a la perpetuación d’esti modelu d’esclavitú. Fai falta un compromisu de tola sociedá y nun dar el llombu a  esta barbarie. Nun mercar sexu ye acabar con ella.

El secretariáu de SUATEA.

Esta entrada tamién se puede consultar en: Castellanu