Home > Profesoráu > SUATEA considera un gran ésitu la movilización na enseñanza

SUATEA considera un gran ésitu la movilización na enseñanza

Esta ye la xornada que tien de llevar al Gobiernu estatal a un cambéu na política educativa que destrúi la educación pública y a la Conseyería d’Educación a considerar les demandes de meyora de les condiciones llaborales del profesoráu asturianu.

La xornada d’ayeri foi un clamorosu reclamu de la comunidá educativa esixendo la derogación de la LOMCE, la reversión de los retayos, la participación de los axentes sociales nes negociaciones del Pactu educativu y, per parte de los sindicatos de docentes, la meyora de les condiciones llaborales del profesoráu. Ye una movilización que tien de suponer un puntu d’inflexón na educación, que tien de frenar la sangría que supón l’amenorgamientu de los presupuestos nesti serviciu públicu fundamental y que tien de faer que’l Gobiernu modifique la so política educativa. Non solo tien de ser el fin de siete años de retrocesu, sinón que tien de ser l’empiezu d’una recuperación que restablezca y aumente el profesoráu perdíu, les beques y ayudes pa los estudiantes, los sofitos y l’atención a la diversidá, que mengüe les ratios, la carga horaria del profesoráu, les tases universitaries y que, a última hora, suponga la dignificación, defensa y promoción de la escuela pública, entendiéndola como la única que garantiza la igualdá d’oportunidaes y que compensa de les diferencies socioeconómiques ente les families. Nun podemos permitinos siguir menguando n’equidá, xugámonos el futuru de delles xeneraciones y la ciudadanía nun ta dispuesta a aceptar la degradación y la mercantilización de la enseñanza.

Dende los centros sofitóse abrumadoramente la convocatoria, les clases tuvieron paralizaes y les aules vacíes. Foi una xornada reivindicativa, ensin actividá docente y que tien d’obligar al Gobiernu estatal a camudar la política educativa que ta destruyendo esti serviciu públicu fundamental.  Foi una movilización que tien de facer tamién reflexonar a la Conseyería d’Educación asturiana, que vio n’escueles ya institutos el descontentu d’un profesoráu que trabaya nunes condiciones llaborales peores que n’otros territorios, tendría de ser el momentu d’abrir les puertes a un diálogu y a una negociación que nos dexe llegar a alcuerdos igual que yá se realizaron n’otres CCAA. Dende SUATEA vamos faer nesti sentíu un pidimientu al Sr. Conseyeru y esperamos, daes les sos declaraciones manifestando la so comprensión de los motivos que llevaron a la fuelga, mayor  receptividá que la tenida hasta esti momentu.

Uviéu, 10 de marzu de 2017

Esta entrada tamién se puede consultar en: Castellanu