Home > Comunicaos > SUATEA considera ineludible’l zarru de les aules concertaes

SUATEA considera ineludible’l zarru de les aules concertaes

A lo llargo de los últimos cursos, especialmente dempués de la entrada en vigor del Decretu 14/2012 de racionalización del gastu públicu nel ámbitu educativu, na enseñanza pública fueron cerrándose unidaes añu a añu, xenerando una situación especialmente sangrante na etapa d’Infantil, polos efectos negativos qu’implica a curtiu y mediu plazu na supervivencia de los centros públicos y pola repercusión nes plantiyes docentes y el despidu de profesoráu interín.

A lo llargo d’esti tiempu, la enseñanza privada concertada siguió recibiendo subvenciones ensin sufrir nengún tipu de retayos. Nestos momentos tán llevándose a cabu la suscripción y renovación de los conciertos educativos y faise pública per parte de la Conseyería d’Educación la propuesta de zarru de 32 unidaes. Esta decisión xustifícase nel cumplimientu de diverses normes que rixen el réxime que se tien qu’aplicar pa estos casos y nun respuenden, nin a una actitú sectaria nin a un retayu cobarde, como pretende faese ver dende’l Partíu Popular y Foru nunes declaraciones demagóxiques y absolutamente tendencioses.

En SUATEA consideramos, como defendimos siempres, que la escuela pública ye la única que garantiza la igualdá d’oportunidaes , la qu’actúa como compensadora de les desigualdaes sociales y la qu’empresta los sos servicios en tolos territorios, polo que ye necesariu defendela estableciendo mecanismos que garanticen el so futuru. Ye imprescindible, poro, establecer el so calter prioritariu, caltener abiertes les sos aules en tolos niveles educativos y esaniciar los conciertos ellí onde haya abondes places públiques.

Según datos emitíos pola mesma Conseyería d’Educación, en munches aules d’escueles y institutos públicos supérense nestos momentos les ratios máximes establecíes. Ante esta situación, dende SUATEA demandamos que se realicen desdobles que dexen amenorgar el númberu d’alumnos y alumnes y garantizar asina una meyor atención educativa.

Uviéu, 4 d’abril de 2017

Esta entrada tamién se puede consultar en: Castellanu