SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
Esti intentu fracasáu ye una prueba más del clima d’impunidá nel que se mueven los escuadrones de la muerte
Dende SUATEA amosamos la nuestra más enérxica condena al atentáu fechu contra’l compañeru sindicalista del sector de la educación Luis Plaza Vélez, Secretariu Xeneral de la CUT Subdirectiva Bolívar, militante del Polu Democráticu Alternativu y del MOIR y afiliáu al Sindicatu Únicu d’Educadores de Bolívar SUDEB.
Los fechos ocurrieron l’otru 16 de mayu na ciudá de Cartagena (Colombia). Cuando’l nuestru compañeru diba xunta’l so escolta tirotiáronlu dos sicarios. Al compañeru Luis Plaza Vélez dende’l mes d’abril d’esti añu asignárase-y un escolta que tien de compartir col compañeru Manuel de Jesús Fernández Leguía, Presidente de SUTIMAC Cartagena, Secretariu de SUTIMAC Nacional, Segundu Vicepresidente de la CUT Bolívar.
Luis Plaza Vélez tuvo va un añu abellugáu n’Asturies nel programa asturianu de derechos humanos, por mor del gran peligru que corría la so vida. Na so estancia los compañeros y compañeres de SUATEA pudimos ver a un home comprometíu cola llucha sindical y la llibertá d’espresión pesie a tener la so vida amenazada. N’Asturies siguió desendolcando’l so llabor docente coles charles feches en dellos centros educativos.
Casi un año depués de volver a Colombia, dotóselu d’un esquema de seguranza claramente insuficiente, yá que namás tien escolta la mitá del tiempu. Dende SUATEA desiximos unes midíes de protección eficaces y suficientes non solo pa Luis Plaza Vélez, sinón pa tolos compañeros y compañeres sindicalistes que cuerren peligru de muerte.
Igualmente, SUATEA desixe al Gobiernu colombianu que-y dea acabu a la situación de terror vivida nesi país pa los y les defensores de los derechos humanos, de la llibertá d’espresión y de la llucha obrera. Nun ye abondo con publicitar l’aniciu d’un procesu de paz en Colombia pa que los medios estranxeros empnderen l’actuación del Gobiernu colombianu; esti gobiernu tien de comprometese de forma efectiva y real col procesu de paz y mirar pola seguranza de tol pueblu colombianu y los sos dirixentes sindicales. Ye un deber del Gobiernu colombianu garantizar los derechos humanos pa tola so población asina como la llibertá d’espresión.
¡POLA LLIBERTÁ SINDICAL EN COLOMBIA!
El Secretariáu de SUATEA
Uviéu 19 de mayu 2014
Esta entrada está disponible en: Castellano (Castellanu)
