Home > Comunicaos > SUATEA-CI refuga el despidu masivu de personal interino

SUATEA-CI refuga el despidu masivu de personal interino

La Confederación Intersindical refuga enérxicamente’l despidu masivu de personal interino previstu nos Presupuestos Estatales
El Proyectu de Presupuestos Xenerales del Estáu de 2017 contien un artículu, el 19, y especialmente l’apartáu Dos, que la so redacción espertó una gran molición ente’l personal interino de les Alministraciones (funcionarios, personal llaboral y estatutariu) y empreses públiques al contemplar que, ente otros aspeutos, la duración d’un nomamientu o contratu d’una persona interina nun puede superar los trés años y, por tanto, que nun pueden encadenase socesivos contratos o nomamientos cola mesma persona.
De la llectura lliteral del artículu espréndese’l despidu masivu de trabayadores interinos de toles alministraciones y empreses públiques.
El Tribunal de Xusticia de la Unión Europea condergó al Estáu Español a qu’abone al personal interino les cantidaes debíes pol términu de contratu. Esta sentencia entá nun ye firme, pero’l gobiernu estatal del PP nun duldó en tratar de “quitar d’enriba” al personal interino y unvialo porcaz y despiadadamente al paru.
Per otru llau, ye una consecuencia directa y lóxica del alcuerdu robláu’l pasáu 29 de marzu ente CCOO, FeSP-UXT, CSI-F y el ministru Montoro sobro la ufierta pública d’empléu masiva pa los próximos años p’amenorgar la tasa d’interinidá hasta dexala nel 8%. Ello ye que l’artículu 19, nel so apartáu Unu, ye la traslación d’esi alcuerdu a los presupuestos. Y el apartáu Dos la consecuencia del mesmu; esto ye, qu’a partir de 2020 el personal interino que quede pierda cualquier posibilidá de consolidar el so empléu.
Los sindicatos firmantes, al aceptar ufiertes masives d’empléu nun cubicaron les consecuencies sobro la estabilidá llaboral del personal interino. Agora, asumiendo la so responsabilidá, tendríen de forzar la retirada de too l’artículu 19 de la Llei de Presupuestos, llegando inclusive a denunciar l’Alcuerdu pal Empléu que lu motivó. Tanto l’alcuerdu robláu como la llimitación de los nomamientos de los Presupuestos nun contribúin al afitamientu del personal interino, sinón más bien tolo contrario; consolida vacantes pero nun estabiliza a les y los trabayadores interinos nos sos puestos.
De nun retirar l’artículu 19 del borrador de Presupuestos la consecuencia pal personal afectáu va ser devastadora, pos impon despidos colectivos, inestabilidá llaboral y una precarización absoluta de la figura del personal temporal inaceptable en pos d’una ineficacia nes Alministraciones pa xustificar nueves privatizaciones.
Por eso, la Confederación Intersindical (na que se integra SUATEA) esixe la eliminación d’esi artículu y propón como solución a l’alta tasa de temporalidá l’aplicación de procesos d’afitamientu p’asitiar al personal anguaño interino de manera que puedan estabilizar la so situación llaboral.
En casu contrariu, la Confederación Intersindical va proponer al colectivu de trabayadores interinos una fuerte movilización de refuga, aprovechando la convocatoria d’una concentración el próximu 27 de mayu en Madrid pa reclamar l’afitamientu del personal interino, nel marcu de la movilización de les Marches de la Dignidá previstes pa esi día.
Secretariáu de la Confederación Intersindical / Secretariáu de SUATEA
11 de mayu de 2017

Esta entrada tamién se puede consultar en: Castellanu