Home > Aición sindical > SUATEA alvierte que nun va consentir el despidu masivu de profesoráu interino.

SUATEA alvierte que nun va consentir el despidu masivu de profesoráu interino.

 

EL MECD EMPECIPIA LA NEGOCIACIÓN DEL PROCESU D’ESTABILIZACIÓN DEL EMPLÉU DOCENTE

STEs-i y SUATEA alvierten que nun van consentir el despidu masivu de profesoráu interino.

Nel día d’ayeri, 28 de xunu, celebróse en Madrid una Mesa sectorial d’Educación, ente’l MECD y los sindicatos, p’afitar les grandes llinies de la Ufierta d’Empléu Públicu docente de los próximos años. La Mesa de negociación tenía como puntu d’orde del día’l procesu d’ estabilización del personal docente interino. Precisamente ayeri publicáronse nel BOE los Presupuestos Xenerales del Estáu pa 2017, qu’integren nel artículu 19.1 l’Alcuerdu pa la Meyora del Empléu robláu con delles Organizaciones Sindicales na Mesa Xeneral de les Alministraciones Públiques el pasáu 29 de marzu, y que van traer ufiertes d’empléu público estraordinaries.

Na Mesa participó una delegación de STEs-i, ente les que taba una persona de SUATEA. Ellí repitimos la nuesa crítica al Alcuerdu pa la meyora del empléu públicu porque en realidá nun asegura l’afitamientu del empléu del personal interino. Sía que non, nesi Alcuerdu recoyíase que les Meses sectoriales decidiríen cómo aplicalu nos distintos sectores públicos. Por eso, dende STES-i, conscientes de lo que suponía pal profesoráu interino, nel mes d’abril reclamamos al MECD la convocatoria inmediata de mesa sectorial, que finalmente se celebró nel día d’ayeri.

El Secretariu d’Estáu d’Educación, Marcial Marín, tresmitió les exes d’actuación que’l MECD considera que se deben llevar a cabu pa executar el procesu d’estabilización d’empléu previstu nos PXE. Aseguró tamién que tienen cuenta d’algamar el máximu consensu ente les partes, esto ye, ente’l MECD, les organizaciones sindicales y les CCAA.

Per una parte, espunxo que’l ministeriu considera que l’actual sistema d’accesu a la función docente -el R.D. 276/2007- ye válidu pa esti oxetivu d’estabilización. Ante esto, STEs-i defendió la necesidá d’arbitrar un sistema estremáu y estraordinariu d’ingresu que faiga posible l’afitamientu real de tol profesoráu interino como personal funcionario de carrera. Nesti mesmu sentíu, asitiáronse toles OOSS presentes na Mesa, a nun ser ANPE, que nun vía mal la llinia del Ministeriu.

Per otru llau, Marín anunció la intención de l’Alministración central de que’l procesu s’execute nos próximos cinco años y que se va tratar d’igualar les oportunidaes pa cada cuerpu docente, con dos años pa caún, y una última convocatoria ‘escoba’ pa tolos cuerpos. Esta propuesta foi bien acoyida pola mayoría de los sindicatos.

Amás, punxo enriba la mesa’l cambéu de temarios, cuestión que queda pendiente d’estudiu y sobre la que los distintos sindicatos planteguemos delles duldes pola incertidume qu’esa priesa puede xenerar ente les persones aspirantes.

Tocántenes al calendariu de negociación, el MECD convocomos a una nueva xunta en setiembre, planteamientu que foi refugáu mayoritariamente poles organizaciones sindicales. Dende STES-i, col fin de nun xenerar inseguridá ya incertidume ente los colectivos afectaos, defendimos l’empiezu de la negociación en xunetu pa dar mayor celeridá al procesu, pero’l MECD caltuvo la so posición y, a lo último, nun se va convocar Mesa sectorial hasta setiembre.

Dende STES-i y SUATEA amosemos la nuesa esmolición énte’l momentu crucial y escepcional nel que tamos. L’Alministración calcula de mano que les places estructurales ocupaes por profesoráu interino a nivel estatal y que van salir a ufierta pública ente 2018 y 2022 van ser ente 110.000 y 150.000. Por ello, si nun se tomen midíes, la mayoría del profesoráu interino va perder el so trabayu si nun llogra una plaza de funcionariu. La tasa de profesoráu interino supera n’Asturies el 30% de la plantiya docente, principalmente pol funcionamientu poco amañosu de l’Alministración al nun realizar ufiertes d’empléu públicu afeches a les necesidaes del sistema educativu. Poro, entendemos que ye necesario y de xusticia dar una salida a estes persones qu’aportaron a la enseñanza al traviés de procesos selectivos bien duros, qu’en munchos casos superaron, anque a la fin nun llograren faese personal funcionario pola escasez de places ufiertaes. Pa ello, vamos defender un cambéu de sistema d’ingresu na función pública docente, un sistema estremáu d’accesu que valore la esperiencia docente hasta’l máximu que se pueda, qu’introduza cambeos importantes na ponderación del concursu y nel formatu de pruebes, que tienen d’empobinase hacia la valoración de la capacidá didáctica y pedagóxica de les persones aspirantes.

Dende STES-i y SUATEA vamos siguir esixendo y reivindicando que’l procesu d’estabilización qu’agora empecipia nun se convierta nun verdaderu ERE pal profesoráu interino. Si’l Ministeriu se caltién na postura de caltener el sistema d’accesu actual, vamos anunciar movilizaciones col entamu de cursu.

 

Secretariáu de SUATEA

29 de xunu de 2017

 

Esta entrada tamién se puede consultar en: Castellanu