Stes-Intersindical vota contra l’informe 2016 del Conseyu Escolar del Estáu

Esta entrada está disponible en: Castellano (Castellanu)

EL PLENU DEL CONSEYU ESCOLAR DEL ESTÁU ESCUEYE EL SO VICEPRESIDENTE Y APRUEBA L’INFORME 2016 COL VOTU EN CONTRA DE STES-INTERSINDICAL

L’asturiana Emma Rodriguez, de SUATEA, foi la vocera de la delegación de STES nun Plenu que nun s’axuntaba dende setiembre de 2015.

El Plenu del Conseyu Escolar del Estáu del 21 de marzu tenía por oxetu la elección del Vicepresidente y l’aprobación del Informe 2016.

STES defende que los cargos unipersonales del Conseyu Escolar del Estáu tienen de respetar la decisión de la sociedá civil y nos dos últimos Parlamentos pronuncióse en contra de la LOMCE. Tanto’l Presidente como la propuesta de güei del Vicepresidente caracterizáronse pol sofitu activu a la LOMCE, teniendo un calter decididamente partidista. STES votó en contra de la elección del vicepresidente, independientemente de los sos méritos personales. El Vicepresidente salió col sofitu de 50 votos a favor, 4 en contra y 1 astención.

L’Informe foi aprobáu por  60 votos a favor, 4 en contra y 1 astención. STES votó en contra al considerar que nun reflexa afechiscamente la situación  d’esmantelamientu de la escuela pública, onde les sos nefastes repercusiones pal profesoráu y sobremanera pal alumnáu tamos viviendo anguaño. Nel cursu qu’analizamos (2014/15) siguieron aplicándose los graves retayos aprobaos en 2012, trayendo graves consecuencies pal conxuntu de la educación. Les elevadísimas ratios y el númberu d’hores lectives y non lectives que tien d’impartir el profesoráu asitia al sistema educativu español en bien mala posición en comparanza col conxuntu européu faciendo casi imposible l’ésitu escolar pa una gran parte del nuesu alumnáu y empiorando les condiciones llaborales del profesoráu. Esti informe nun reflexa abondo l’efectu d’estos retayos, nin l’efectu d’un aspeutu tan importante pal nuesu sistema educativu como ye la eliminación de decenes de miles de profesores que trai de resultes  l’amenorgamientu de la calidá de la enseñanza que recibe l’alumnáu.

El cursu 14-15 foi, a última hora, una oportunidá perdida pa la educación nel nuesu país. Tal que se demostró apocayá cola convocatoria de la fuelga xeneral na enseñanza, la comunidá educativa sigui reivindicando la derogación de la LOMCE, la reversión de los retayos, l’aumentu de la inversión y de les beques y ayudes coles mires de llegar a la gratuidá. Demandamos que l’esaniciu de la  inestabilidá y precariedá nel empléu del profesoráu interino tien de formar parte d’un pactu pola escuela pública, l’únicu pactu güei asumible p’acabar con años d’esmantelamientu de la enseñanza pública y de degradación de les condiciones llaborales de los y les docentes.

L’aprobación de les enmiendes sobre Ceuta y Melilla supón un respaldu a les constantes denuncies sobre los problemes que sufre’l sistema educativu nestes ciudaes asina como a les  nueses reivindicaciones sobre asuntos como les ratios desproporcionadamente illegales, la falta de centros educativos y la escasa atención a los alumnos con necesidaes educatives especiales.

El secretariáu de SUATEA

21 de marzu de 2017

Print Friendly, PDF & Email

Esta entrada está disponible en: Castellano (Castellanu)