Home > Aición sindical > Somos voz, somos fuercia, XUNTES construyimos futuru

Somos voz, somos fuercia, XUNTES construyimos futuru

Muyer STEsMunchos son los sieglos desque la primer muyer oradora se dedicara a esparder el conocimientu, lo que-y valió la consideración d’hetaira (concubina) como única faceta a destacar, arrequexando a un planu casi desconocíu la so dimensión d’oradora. Foi esta la primer maestra de Retórica de la que tenemos conocimientu. La so palabra y la so figura tapeciéronles por mieu al poder de la so imaxe como modelu a siguir. Culta, formosa, docta n’artes lúdiques, con una capacidá d’elocuencia y un usu de les sos técniques facía que pudiera percanciar el poder, esta foi Aspasia. Munchos años menos pasaron desque una muyer española se llevantara nel Parlamento y al traviés de la so voz solicitara’l derechu de les muyeres a participar na vida pública del so país, lo que la llevó al destierru voluntariu y a la perda de la confianza de los sos propios compañeros de partíu: Doña Clara Campoamor tamién yera peligrosa como modelu.

La palabra pública, la VOZ, ye’l meyor preséu pa glayar les inxusticies, pa clamiar el dolor, pa rir la gayola, ye la que mos permite dicir “yo soi”, “yo toi”. Ye la manera más directa de pidir lo que ye d’una, y sobre too, ye la manera de contar a los y les demás y a nós mesmes cómo vemos el mundu y cómo lu queremos.

Esti 8 de marzu, la Organización de Muyeres de la Confederación Intersindical vuelve a valise de la palabra pa reivindicar la necesidá de tar xuntes, de texer redes pa tener más FUERCIA p’apropianos d’esta palabra, tan venceyada al campu semánticu masculín. La fuercia que mos da trabayar cada día nos nuestros distintos sectores pa defender los derechos de les muyeres, que -los algamaos y los que non- éstes ven peligrar ca vez que se descuiden, como consecuencia de la involución ideolóxica que s’asitió na política y na sociedá.

Cuestionenos el nuestru derechu a decidir sobre’l nuestru propiu cuerpu, siguen condenándonos a xornales más baxos y más precarios, frutu toos dos de les reformes llaborales pro-empresa que se fexeron nesti deceniu. Siguen poniéndonos torgues a la incorporación al mundu llaboral, propiciando la nuestra vuelta al llar y l’asunción d’una doble o triple xornada cola eliminación práctica (recortes) de la Llei de Dependencia. Non contentos, siguen viendo cómo se mos asesina y, sicasí, retiren les midíes d’atención económica necesaria pa combatir y esaniciar la violencia de xéneru. ¡Con una campaña pal día 25 depayares cubre l’espediente la/el responsable n’igualdá d’esti país! Convirtiendo asina la Llei contra la violencia de xéneru en simple papel moyao, de mui revesosa aplicación.

Cola sida del abandonu escolar y los sesgaos resultaos Pisa, y aprovechando qu’“el Pisuerga pasa per Valladolid”, imponen una reforma educativa que quita a la futura ciudadanía la capacidad de desenrrollar una mente más crítica, una sociedá más igualitaria, una educación dende les primeres etapes basada na coeducación, nel respetu a lo diferente, nel apreciu a lo femenino, puesto que lo masculino ya ta apreciao abondo, y amás defenden l’enseñu estremáu por sexos faciéndonos dos grupos “homoxéneos” ensin respetu a la diversidá individual de cada persona, independientemente del xénero que se-y atribuya. Y, como colofón, impulsen l’enseñu nes aules públiques de la relixón, bastión de la misoxinia y del patriarcáu.

Pero, non contentos con eso, vuelven a apertanos media vuelta más de tuerca con un Anteproyectu de llei sobre l’exerciciu de la corresponsabilidá parental y otres midíes a adoptar nos casos de nulidá, separación o divorciu, que claramente toca derechos básicos de les neñes y neños, de les partes individuales y, sobre too, de les muyeres, en tanto que da agospiu a la demanda d’ una escasa parte de la población que reivindica “la so paternidá de sópitu” y que fai davezu de la custodia compartida una amenaza y una venganza contra la otra parte mayoritariamente mujeres, amén de la probitú dafechu na que va dexar a millones de muyeres de más de 45 años que, por dedicase a cuidar la familia, como pautu social-familiar, nun cotizaron.

Por eso dende la Organización de Muyeres de la Confederación Intersindical nesti 8 de marzu de 2015 dicimos:

  • Nun vamos recular nel camín d’algamar los derechos de las muyeres.
  • Vamos siguir lluchando en tolos ámbitos de la nuestra competencia pa que la llei que regula la igualdá nesti país llogre finalmente la igualdá efectiva
  • Vamos siguir desixendo al gobiernu la retirada darréu del so Anteproyectu de llei sobre l’exerciciu de la corresponsabilidá parental que pon en peligru a madres y fíes/os al recoyer la posibilidá de qu’a un maltratador se-ye conceda la custodia compartida.
  • Vamos demandar una y otra vez la dotación presupuestaria y estructural amañosa pa que l’atención a les persones dependientes llegue a tol que lo necesite.
  • Vamos siguir demandándo-y al gobiernu que dexe de llevantar falses espectatives al anunciar, fuera de tiempu, la so intención de volver a meter la educación n’igualdá nes escueles depués d’eliminala esplícitamente del currículum educativu na LOMCE, arreblangando pelos encamientos llegales internacionales al respectu y los d’instituciones acreditaes del estáu español. Nun pidimos remiendos d’última hora sinón la consideranza y el reconocimientu necesariu de la importancia que tien la educación n’igualdá pa eliminar la discriminación y estereotipos sexistes que se siguen tresmitiendo nel sistema educativu y pa esaniciar d’una vez la violencia hacia les muyeres que sigue medrando nesti país.
  • Vamos aneciar en reclamar la retirada de la impuesta LOMCE por considerar que torga una educación n’igualdá de condiciones pa toles personas d’esti país, potenciando la instrucción competitiva en cuenta de la formación collaborativa que da llugar a sociedaes más xustes.
  • Vamos siguir reivindicado una escuela pública laica, llibre de sexistes prexuicios relixosos, y respetuosa cola diversidá de cada persona.

Somos voz, somos fuercia, xuntes construimos el futuru que merecemos y que merecen les nuestres fíes y fíos.

Empecipiar ye revesoso,
pero vamos dando los pasos,
por un futuru,
que losfíos podian celebrar.
Somos el vientu, que bailla y que canta.
Si tamos xuntes, somos furacán
Nun tamos de pasu,
nun somos fracasu.
Amparanoia

 

Madrid 8 de marzu de 2015
Organización de Muyeres de la Confederación Intersindical

 

Propuesta Didáctica (dende infantil hasta educación d’adultos) pa trabayar nel aula con motivu del 8 de marzu, Día Internacional de les Muyeres.

Esta entrada tamién se puede consultar en: Castellanu