Home > Centros educativos > Solucionáu’l tresporte escolar de Nuevu Santuyano(Mieres)

Solucionáu’l tresporte escolar de Nuevu Santuyano(Mieres)

SUATEA participó güei pela mañana na movilización de la comunidá escolar de la escuela mierense Llerón-Clarín delantre del edificiu de la Conseyería d’Educación pa demandar una solución definitiva a la prestación de los servicios de  tresporte escolar  y comedor gratuitos pa los escolares que residen en Nuevu Santuyano. Sucedía que’l Consorciu de Tresporte d’Asturies (CTA) consideraba esta población integrada na localidá de Mieres del Camín. Consecuencia d’ello y aplicando’l reglamentu de tresporte escolar vixente, que restrinxe’l derechu a esi serviciu si la residencia del alumnáu ta na mesma localidá del centru educativu, determinó que, al respective d’esa, col tiempu suprimiríase la so gratuidá y polo tanto tamién el derechu a comedor. 

La conceyala Educación y l’Alcalde de Mieres lleven presentando dende’l cursu pasáu na Conseyería Educación informes avalando que Nuevu Santuyano ye una población que dista de la escuela LLerón-Clarín más de 2,5 Km, que nun pertenez a  la localidá de Mieres del Camín y que, polo tanto, tol alumnáu de Nuevu Santuyano tien derechu a aquellos servicios.

Fizo falta una movilización con cacerolada de padres, madres, alumnáu y la presencia del Alcalde y la Conceyala d’Educación de Mieres, pa que la Conseyería resolviera definitivamente un problema meramente burocráticu de comunicación col CTA  qu’afectaba gravemente al derechu que tien esti pueblu  a la educación y a recibir los servicios complementarios básicos de tresporte y comedor  n’igualdá de condiciones del restu la población asturiana.

Préstamos dende SUATEA que, anque tarde,  se solucionare’l problema.  Esperamos qu’otros problemes más específicos de tresporte escolar como los que sufren localidaes como Uxo o Turón nel conceyu Mieres onde les escueles disten menos de 1,5 km (distancia mínima pa tener derechu a tresporte escolar) de los lugares de residencia del alumnáu,  pero desixen desplazamientos peatonales difíciles y peligrosos a los centros educativos, se solucionen ensin necesidá de movilizaciones nin d’esperar tantu tiempu.

El Secretariáu de SUATEA

N’Uviéu a 28 de setiembre de 2020

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344