Home > Comunicaos > Sobre retribuciones: D’aquellos polvos esta llamuerga.

Sobre retribuciones: D’aquellos polvos esta llamuerga.

Cuando’l gobiernu del Principáu aprobó la Llei 9/2009, de 29 d’avientu, d’Evaluación de la Función Docente y los sos Incentivos, SUATEA, xunto con otros sindicatos, opunxímonos frontalmente a la mesma por distintes razones.

Per una parte, el sofitu de dos sindicatos a la Llei suponía la rotura de la unidá sindical hasta entós esistente esixendo la “homologación salarial” cola media del restu del profesoráu del estáu.

Per otra, venceyar un complementu retributivu a una evaluación del profesoráu per parte de la dirección de los centros, cosa que namá esiste n’Asturies, significaba abrir  la puerta a la medría de la desigualdá salarial, a l’arbitrariedá y a la indefensión del profesoráu críticu al depender parte de les sos retribuciones de la evaluación d’un superior.

También mos paecía inadmitible’l qu’esa llei dexara fuera al profesoráu interín o al profesoráu con baxes llargues por enfermedá (pa los que les sos retribuciones yá se ven amenorgaes de resultes d’ella).

Amás, el Plan d’Evaluación añal pue camudar d’un añu pa otru, lo cual va poder suponer que, nel futuru, y cola sida de la “necesaria austeridá” o cualesquier otra, namá una parte del profesoráu puea acceder a esi complementu.

Por si fora poco, inclusive cola aplicación d’esi complementu, les retribuciones de los docentes n’Asturies siguíen y siguen tando a lo cabero de les del Estáu.

Aporfiamos en que nun contemplar al profesoráu interiro en negociacioens retributives o llaborales ye inadmitible. Irónicamente, los  mesmos sindicatos que sofitaron una llei que lo esclúi de manera espresa, son quien piden qu’esi mesmu profesoráu puea beneficiase del complementu retributivu del que fueron escluyíos.

En vista de tolo anterior, y ante’l reciente autu de la Unión Europea  que declaren que’l profesoráu interino nun pue ser discrimináu en comparanza col profesoráu funcionario de carrera, dende SUATEA caltenemos:

  1. La igualdá en derechos (llaborales, retributivos) y deberes del profesoráu interín foi siempres una de les esixencies del nuesu sindicatu en tolos terrenos. Nenguna persona que realiza igual trabayu, tien de ser discriminada en función de la so situación alministrativa.
  2. La Llei d’Evaluación ye una llei inxusta por discriminatoria y porque va sirvir, cuando l’alministración educativa quiera, pa facilitar los retayos; al par qu’una llei coercitiva, al facer depender parte del salariu d’una valoración de les direcciones de los centros.
  3. Esta llei tendría de ser abolida y dar pasu a una negociación retributiva que suponga una medría llinial de les remuneraciones, que nun discrimine a naide, que nun tea suxeta a evaluación y que faiga recuperar parte del poder adquisitivu perdíu pol profesoráu asturiano asitiándolo na media retributiva del Estáu.

 

Uviéu, 29 de setiembre de 2016

Esta entrada tamién se puede consultar en: Castellanu