Sobre l’Alcuerdu de Meyora del Empléu Públicu

El Plenu de la Confederación Intersindical na que se integra’l SUATEA, nel conceyu del 1 d’abril de  2017, alcordó ratificar un resolvimientu sobre l’Alcuerdu de Meyora del Empléu Públicu ente’l Ministeriu de Facienda y Alministración Pública y les organizaciones sindicales CCOO, CSI-F y UXT nel marcu de la Mesa Xeneral de les Alministraciones Públiques.

L’Alcuerdu robláu, el 29 de marzu de 2017, contempla, básicamente lo siguiente:

Establez, pal añu 2017, una tasa de reposición del 100% nos sectores consideraos como prioritarios: Sanidá, Educación, Alministración de Xusticia, Servicios Sociales, etc. ente que, pal restu de sectores, la tasa de reposición afitar nel 50%.

Per otra parte, ensin que compute a efectos de tasa de reposición, autorízase a les Alministraciones Públiques, en materia servicios prioritarios, a convocar ufiertes d’empléu, nos próximos trés años, con aquelles places que tean, polo menos tres años, cubiertes por personal temporal y por un máximu del 90% d’estes places. Los procesos selectivos d’estes ufiertes van realizase pol procedimientu ordinariu previstu reglamentariamente.

A lo último, nun va computar a efectos de tasa de reposición la convocatoria de places nos términos previstos na disposición transitoria 4 del TREBEB; esto ye, places que, con fecha anterior al 1 de xineru de 2005, fueren ocupaes ininterrumpidamente de forma interina o temporal. A diferencia del apartáu anterior, la DT4 del TREBEB dexa que les pruebes guarden relación colos procedimientos, xeres y funciones davezu y que se valore, como méritu, los servicios emprestaos y l’esperiencia nel puestu de trabayu oxetu de la convocatoria.

Analizando’l conteníu del Alcuerdu, cualitativamente, introduzse un elementu qu’aburuya lo que podría ser una verdadera política d’amenorgamientu de la temporalidá, que ye, la esclusión d’aquellos sectores non consideraos prioritarios. Pa la Confederación Intersindical, la temporalidá, como problema de precariedá llaboral, ye’l mesmu, culisquiera que sía’l sector de l’alministración pública y, amás, dende un puntu de vista de xestión, tan primordial ye’l personal qu’empresta’l serviciu directamente, como’l que lo xestiona alministrativamente.

Si entramos a analizar qué diz l’Alcuerdu sobre les fórmules d’accesu previstes pa estes ufiertes d’empléu, vemos qu’hai dos alternatives: una, con calter xeneral, suxeta al concursu-oposición ordinariu y, la segunda, por aciu l’aplicación de la DT4 del TREBEB. Considerando que la DT4 del TREBEB llinda estes ufiertes a les places vacantes con anterioridá al 1 de xineru de 2005, paez que, faciendo una interpretación rigorosa, nun van ser munches les places que puedan incluyise nesta modalidá de fórmula d’accesu. Poro, podemos concluyir que l’Alcuerdu va poder ser útil p’amenorgar la temporalidá, pero, non tanto, pa consolidar al personal interino.

Agora bien, les grandes ausentes del Alcuerdu son otres materies que, nin tán nin se les espera. Les retribuciones pa 2017, la recuperación del poder adquisitivu perdíu, la xubilación parcial o retribuciones en situación d’incapacidá temporal, por poner dellos exemplos, nun tuvieron entrada nun alcuerdu que pretende reflexar los Presupuestos Xenerales del Estáu, como asina se ta vendiendo, les meyores llaborales d’esti personal.

Dende la Confederación Intersindical, ante un supuestu escenariu de recuperación económica y de una cierta debilidá del Gobiernu del Estáu tocantes a les mayoríes parlamentaries se refier y nun momentu nel que la xurisprudencia de los tribunales estatales y europeos cuestionen l’abusu de la temporalidá nes Alministraciones Públiques, creemos que se dexó pasar una oportunidá única pa consiguir meyores llaborales, que desanicien los efectos de los retayos de la crisis.

Yera’l momentu de suprimir les llendes a la tasa de reposición y flexibilizar les places que se puedieren incluyir na DT4 del TREBEB, de forma que fueren les alministraciones territoriales, les qu’axustaren, nos sos respectivos ámbitos, la estratexa d’amenorgamientu de la temporalidá, ensin escluyir nengún sector y buscando l’equilibriu ente’l nuevu accesu y l’afitamientu del empléu. Coles mesmes, procedía introducir delles meyores; empezando pola derogación del RDL 20/2012 y siguiendo pola recuperación del poder adquisitivu, nun alcuerdu que, a lo último, constitúi un balón d’osíxenu pal gobiernu na tramitación parlamentaria de los Presupuestos Xenerales del Estáu pa 2017.

Como conclusión y atendiendo a les razones espuestes, la Confederación Intersindical fai una valoración negativa del Alcuerdu pa la Meyora del Empléu Públicu, por considerar que nun enceta globalmente’l problema de la temporalidá, escluyendo a sectores públicos importantes, como’l de l’alministración xeneral y otros, del so ámbitu d’aplicación; asina como, tampoco, ufierta una solución real al afitamientu del personal interino. Amás, ignórase cualquier midida que contribuya a la recuperación de les condiciones llaborales perdíes de resultes de la política de retayos en materia de servicios públicos llevada a efectu nos últimos años.

Pa la Confederación Intersindical, los sindicatos firmantes llevaron a cabu un exerciciu sublime d’arrenunciu del so papel reivindicativu en defensa de los intereses de les emplegaes y emplegaos públicos, con un alcuerdu faltu d’aspiraciones que, sicasí, si contribúi a restituyir la estropiada imaxe pública del Ministru Montoro y p’allanar el camín de la tramitación parlamentaria de los Presupuestos Xenerales del Estáu pa 2017.