Sobre la reválida de sestu cursu de primaria

Publicóse nel BOE el Real Decreto que regula les pruebes de la evaluación final de 6º de Primaria. Yá se concretó, por desgracia, la base normativa de lo que va trayer la implantación d’esta reválida a un alumnáu que tará acabante de cumplir los 12 años d’edá. Someteráse a estos neños y neñes a una situación d’estrés inxusta ya inútil dende una perspectiva pedagóxica, tresmitiéndo-yos amás un modelu d’educación afincáu na superación de pruebes esternes que van ser les que marquen los informes que van dir constryendo’l so espediente académicu.

Na antoxana del testu, queden bien clares delles de les consecuencies de la implantación d’esta evaluación: Valdrá pa definir les metes que l’alumnáu tien que superar y va ser una ferramienta p’abordar per parte del profesoráu un cambiu na metodoloxía del enseñu. Esto namás pue traducise d’una manera: obliga al profesoráu a centrar el procesu d’enseñanza-aprendizaxe na superación d’una prueba final, fecha por profesoráu ayenu al alumnáu y que escaezse de la formación global de la persona atendiendo a la diversidá y respetando los intereses y los procesos de maduración individuales.

Énte esti despropósitu, solo queda una alternativa: la oposición dafechu de tola comunidá educativa. Nestos últimos díes viose a dalgún Conseyeru de Educación d’otres Comunidaes Autónomes encabezando una manifestación contra la LOMCE y la so aplicación. Lo menos que podemos pidir n’Asturies ye una posición clara contra la puesta en marcha de midíes como la reválida de sestu cursu. Nun podemos conformanos con declaraciones que nun sean ratificaes con fechos concretos. Esiximos a la nuestra alministración que diga un non dafechu a les reválides, que defenda la calidá educativa y que emplegue los recursos económicos que traen con elles eses pruebes pa revertir el progresivo estrozu que causen los retayos educativos.