Home > Comunicaos > Siguimos lluchando pol nuestru derechu a decidir

Siguimos lluchando pol nuestru derechu a decidir

La Organización de Muyer de SUATEA felicítase de la retirada de la reforma de la Llei del albuertu y la decisión del ministru Ruíz Gallardón de dimitir. Trátase d’una victoria algamada por toes eses muyeres que salieron a la cai en defensa de los sos derechos. El clamor popular materializóse en multitú de manifestaciones, protestes y acciones a lo llargo de toos estos meses. Les muestres d’apoyu hacia les muyeres españoles llovieron dende tolos continentes y les muestres de sororidá manifestáronse proponiendo idees p’ayudar a aquelles muyeres que quixeren interrumpir el so embarazu y la reforma de la llei-yos lo torgara.

Nonostante, somos conscientes que la decisión de la retirada nun se tomó por respetu al derechu a decidir de les muyeres, sinón porque pesó más l’interés polos votos. Una vez más los dirixentes d’esta sociedá patriarcal amosaron el pocu respetu que-y tienen a les muyeres, los sos derechos y les sos opiniones.

Llogremos una gran victoria pero la guerra sigue. Tovía ta pendiente’l Recursu presentáu pol PP énte’l Tribunal Constitucional pola Llei del albuertu del 2010. El fallu d’esti Tribunal puede suponer una modificación importante de l’actual llei en vigor. D’otru llau, ta por ver cómo se desendolca’l Proyectu de Protección a la familia anunciáu por Rajoy. Amás, el Ministeriu de Facienda unvió un documentu a les CCAA onde se propón el copagu por interrupciones del embarazu. Les amenazaes sobre’l derechu a decidir de les muyeres siguen abiertes.

N’Asturies, asinamesmo, tamos pendientes de la resolución de la ILP presentada por UPyD pela que se regula una rede d’apoyu a la muyer embarazada. Nesti casu, plantéguense falacies como que l’albuertu ye la mayor causa de mortalidá n’España, o que les mujeres que deciden interrumpir el so embarazu fáenlo por una situación de desamparu. L’envís ye es simplemente pañar fondos pa ONG’s privaes que supuestamente orienten y apoyen a les muyeres embarazaes.

La Organización de Muyer de SUATEA desixe la retirada d’esta ILP. Igualmente llamamos a la participación masiva na Manifestación convocada pola Plataforma Feminista d’Asturies que va ser el domingu 28 setiembre a les 12:00 hores n’Uviéu con salida de la estación de Renfe. Esti día ha ser de celebración pola victoria algamada pero tamién d’alvertencia para quien sigan vulnerando los derechos de les muyeres.

Por un albuertu llibre, seguru y de baldre

Uviéu, 26 de setiembre de 2014

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339