Home > Comunicaos > Siguen los parches nuna Llei que fai agua

Siguen los parches nuna Llei que fai agua

SUATEA denuncia que los cambeos normativos continuos inciden na calidá educativa

 Acaben d’anunciar dende’l Ministeriu d’Educación un nuevu Real Decretu nel que se van concretar les condiciones de titulación de la ESO. Dende’l mesmu momentu que’l Gobiernu impunxo l’aplicación de la LOMCE, vivimos nos centros un continuu llover de normatives que regulen aspeutos fundamentales, tanto del currículu como de les evaluaciones, que caltienen na incertidume constante a profesoráu y alumnáu dende va cuatro años.

Naide que conoza mínimamente el mundu educativu puede afirmar qu’estos cambeos continuos ya improvisaos nun tienen efectu na calidá educativa. Demuéstrase claramente que la reivindicación de derogación de la LOMCE yera (y sigue siendo) imprescindible; que los argumentos d’incertidume llegal pa nun faelo yeren una falacia yá que nun hai mayor incertidume que la vivida nestos momentos cola solombra d’un tercer cambéu lexislativu no que va de cursu.

Nada tienen que ver toes estes midíes cola calidá educativa, dende’l Gobiernu tendríen d’escuchar les demandes manifestaes apocayá nes cais por estudiantes, families y profesoráu, nes que se piden más medios p’atender a la diversidá, más profesoráu, menos ratios nes aules y en definitiva más inversión y reversión de los retayos efectuaos n’educación.

N’Asturies tamién ye noticia la selección de centros que van realizar les reválides de 4º de la ESO y 6º de Primaria. Magar de les hipócrites palabres del Conseyeru sofitando les razones pa la convocatoria de la última fuelga, siguimos siendo la Comunidá Autónoma que va sufrir nuevamente y a raxatabla l’aplicación d’una llei que se diz refugar. La sobrecarga burocrática del profesoráu y l’estrés estéril pal alumnáu vivíu l’añu pasáu coles pruebes de Primaria, pretenden repitise pa llevar a cabu un actu que yá se demostró inútil.

Tola comunidá educativa, que manifestó’l so refugu paralizando la enseñanza pública cola convocatoria de fuelga en diverses ocasiones y manifestaciones masives, clama pola derogación definitiva de la LOMCE, pola non realización de les reválides y pola defensa clara de la enseñanza pública como única garante de la igualdá d’oportunidaes. SUATEA, como parte d’esti movimientu asume toes estes reivindicaciones y caltiense nel refugu de l’aplicación de la nueva Llei.

Uviéu, 19 d’abril de 2017

Esta entrada tamién se puede consultar en: Castellanu