Home > Comunicaos > Si daqué ye gratis, el productu yes tu

Si daqué ye gratis, el productu yes tu

 SI DAQUÉ YE GRATIS, EL PRODUCTU YES TU: RETIRADA DEL PROYECTU CIBERASTUR.

La Conseyería d’Educación entamó’l “Proyectu ciberastur”, una iniciativa empobinada a conocer la situación del acosu y ciberacosu nos centros asturianos onde s’imparta ESO, Bachilleratu y TVA (Transición a la Vida Adulta). Dende SUATEA, nel comunicáu unviáu a la prensa’l día 31 de marzu, yá amosábamos la nuesa oposición al entamu d’esti Proyectu, que’l  so plazu de realización supón alteriar  la marcha de los centros educativos, pues ye la enésima encuesta que l’alumnáu tien que realizar esti cursu.

Ante les denuncies de SUATEA y otres organizaciones, la Conseyería dirixóse a les direcciones de los centros en primer llugar pa garantizar que se trataba d’una actividá con costu cero pa la Conseyería. Recordemos  qu’esti estudiu va ser realizáu pola Universidá Internacional de la Rioja, una universidá privada d’enseñanza 100% online con sede en Logroño y que los sos precios pa realizar actividaes como Másteres tán ente los más altos del estáu.

Esta selmana, la Conseyería unvió una nota empobinada a les  direcciones de los centros na qu’indicaba que yá nun yera menester introducir el NIE de cada alumnu o alumna pa realizar les encuestes correspondientes – encuestes que según estimaciones de dellos equipos directivos van suponer la perda de más d’una hora lectiva pal alumnáu, pues tienen de realizase nel centru al traviés de los sos medios informáticos.

El representante de SUATEA nel Conseyu Escolar del Principáu al  rematar el plenu desenvueltu’l pasáu martes 18 d’abril -na vez de ruegos y entrugues- amosó la molición d’esti sindicatu ante la contratación d’una empresa privada pa la realización d’esti Proyectu.  El mesmu presidente del Conseyu recordó que se ta realizando un estudiu sobre Convivencia Escolar promovíu pol mesmu Conseyu Escolar del Principáu. Pero nun hubo respuesta.

Dende’l profesoráu y les families alzáronse voces contraries a la realización  d’esti estudiu sobre ciberacosu.  Al cúmulu de xeres burocrátiques que se desenvuelven nel tercer trimestre, que van aumentando cada añu y que dexen a les direcciones y al profesoráu somorguiaos nun númberu cada vez mayor de xestiones, dende la Conseyería saquen nueves “actividaes” ensin consultar nin la disponibilidá de personal nin la oportunidá temporal pa llevales a cabu. Les families refuguen sobremanera la invasión de la so esfera privada y el posible usu de los datos llograos.

Pa SUATEA, les  posibilidaes d’actuación del profesoráu ante l’acosu escolar fueron amenorgaes de resultes de los retayos. L’aumentu del trabayu burocráticu, de les hores lectives y d’alumnáu per aula, la falta de personal pa faer sofitos o desdobles y l’ausencia de profesionales non docentes, como trabayadores sociales que pudieren realizar un trabayu más personalizáu y específicu, repercuten negativamente na capacidá pa encetar los problemes de convivencia y violencia que supón el bullying.

Lo que paez claro ye que si una empresa realiza gratuitamente un trabayu de tal complexidá ye porque lo que taría en xuegu sería l’accesu a miles de datos susceptibles de ser emplegaos darréu nel so beneficiu. Esti ye’l gran negociu del sieglu: los big data, qu’anguaño son ún de los mayores  nichos de negociu a nivel mundial.

Como dicíemos nel títulu: si daqué ye gratis, el productu yes tu. Nesti casu, el productu podríen ser los miles de datos que podríen llograse de los usos y costumes del alumnáu asturiano al usar Internet y otres informaciones más sensibles. Dende SUATEA pensamos que con calter inmediatu la Conseyería d’Educación tendría d’arrenunciar de llevar a cabu esti proyectu pa evitar males mayores. Entá se ta a tiempu faelo y ello redundaría en beneficiu de tola comunidá educativa.

Uviéu, 20 d’abril de 2017

Esta entrada tamién se puede consultar en: Castellanu