Oficialidá
L'asturianu, llingua oficial

Acabóse la espera: ¡OFICIALIDÁ YÁ!

Esta entrada está disponible en: Castellano (Castellanu)

Celebramos esti añu 2021 la cuarenta y dos edición del Día de les Lletres Asturianes. Otra vez más vien marcáu pol andanciu de la Covid-19 que nun mos va dexar entamar les multitudinaries protestes de reivindicación de la oficialidá na cai. Reivindicación de la mayoría social asturiana que denuncia añu tres añu la falta de normalidá demócrática reclamando un derechu del qu’esfruten n’otros territorios del Estáu español y que a la ciudadanía asturiano se mos niega. Un derechu que nun tienen les persones asturianes a espresase n’asturianu o gallego-asturiano y que grupos sociales minoritarios con señaldá de tiempos d’impuesta uniformidá llingüística aporfíen pa que nun se reconoza. Contaminen la opinión pública ayudaos por dellos grupos de comunicación de mases, queriendo convencemos de que reconocer la igualdá de derechos llingüísticos ye una imposición. 

 Acabar con una anormalidá democrática, instaurar la igualdá, reconocer un mundu multicolor, multicultural, multiétnicu, asumir la diversidá sexual resulta-yos mui raro nel mundu gris de privilexos nel que lleven viviendo dende cuantayá. Abrir otru espaciu más de color a los yá abiertos colos reconocimientos llegales del  divorciu, matrimoniu homosexual, albuertu, agora eutanasia…  arreviénta-yos les vidayes y contribúi dafechu a la descomposición del caltenimientu del so universu de privilexos. 

Cuarenta y dos años, son yá años  asgaya obligándomos a esperar por un futuru granible pa les nuestres llingües. Nun pue allargase más la espera reivindicativa si nun queremos asistir al esaniciu por inanición del nuestru patrimoniu llingüísticu. Ye agora’l momentu críticu onde aplicar midíes drástiques que les salven del abandonu sufríu: oficialidá y llei de normalización llingüística nel so desarrollu. Los cuidaos paliativos emplegaos pol actual Gobiernu, angaño y nel pasáu, a los que se quieren axuntar agora les fuercies polítiques conservadores nun solucionen el verdaderu problema que ye urxente encarar: la perda adulces de la tresmisión llingüística interxeneracional. Nun mundu cada vegada más tecnolixizáu, la comunicación interpersonal ta mediatizada enforma poles TICs y los medios de comunicación de mases. Éstos y la Escuela sustituyen aceleradamente l’efectu de la llamada “tresmisión natural” llingüística de los ascendientes familiares, padres-madres y güelos-güeles, a la reciella. Siendo ínfimu l’espaciu dau a les nuestres llingües por estos medios y les nuestres instituciones  , pal so desaniciu nun ye menester aplicar medios activos d’esterminiu: basta cola pasividá de la espera.   

Les fuerces reaccionaries perconocen la cuestión.  Asina  que cuando ven les anovaes intenciones del Executivu asturianu d’inocular l’antídotu de la OFICIALIDÁ, destiláu en comuña cola representación progresista de la Xunta Xeneral  a partir de la collecha de la movilización popular na cai, y cuando ven tamién que dalguna fuerza conservadora se pue apuntar a l’andecha, proponen siguir col mazcaritu de la Llei d’Usu como preventivu de la muerte que persaben segura. Yá nun ye tiempu d’espera, la Xunta Xeneral tien d’aniciar  l’alderique y la busca de consensu  pa reformar l’Estatutu d’Autonomía d’Asturies onde definitivamente se resuelva’l déficit democráticu que sufrimos los asturianos y asturianes, y se reconoza d’una vez la OFICIALIDÁ pa les nuestres llingües.

El Secretariáu de SUATEA

N’Uviéu a 3 de mayude 2021

Print Friendly, PDF & Email

Esta entrada está disponible en: Castellano (Castellanu)


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757