Rueda de prensa SUATEA

Esta entrada está disponible en: Castellano (Castellanu)

El sindicatu d’enseñanza asturianu SUATEA dio esta mañana una rueda de prensa na qu’informó de dos puntos d’especial relevancia pola so actualidá: la convocatoria d’oposiciones y una valoración de la mesma y la oficialidá de la llingua asturiana y gallego-asturianu.
Tocantes al primer puntu, SUATEA recordó qu’anguaño hai un númberu bien importante de personal docente en fraude de llei, esto ye, que lleven dellos años enriestrando contratos ensin poder estabilizase nel so puestu de trabayu. Nesti sentíu, los representantes del sindicatu recordaron qu’esisten especialidaes nes que les oposiciones lleven décades ensin convocase (bon exemplu d’ello son les especialidaes de Llatín y Griegu) colo que’l profesoráu enxamás tuvo la posibilidá de presentase a una oposición y estabilizase, y, décades dempués, podríen perder el so puestu de trabayu. Amás, recuérdase qu’esta situación de fraude de llei ta xeneralizada tamién a les especialidaes que sí salen a oposición regularmente, pues l’alministración tradicionalmente convocaba menos places de les necesaries, lo que llevaba a que persones que, aprobando la oposición, quedaben ensin plaza pero, al empar, yeren contrataes para exercer de docentes, dicho otra manera, sacábense places de menos pa precarizar a una parte del profesoráu.
De resultes d’esa acumuladura de personal temporal xenerada pola mesma alministración, SUATEA siempres plantegó una doble vía d’accesu, esto ye, una oposición llibre que dexe a los nuevos aspirantes consiguir plaza, y una acutada qu’estabilice al profesoráu interino, para compensar l’abusu sistemáticu al que los sometió l’alministración al nun sacar les places que taba obligada a ufiertar. Precisamente, les enmiendes presentaes pola mayoría de los grupos parllamentarios al proyeutu de llei de midíes urxentes pal amenorgamientu de la temporalidá nel empléu públicu, anguaño n’alderique nel Congresu, van nesta llínea. Y cuando tamos nesti ambiente d’allegalidá nel cambéu d’accesu a la función pública, la conseyería d’educación d’Asturies desmárcarse con una convocatoria d’oposiciones pal cuerpu  maestros na que vuelve primar la fase d’oposición sobro la de concursu infravalorando, una vegada más, la esperiencia llaboral docente.
Per otru llau, dende SUATEA señalóse que la convocatoria realizóse muncho primero que n’otros años, lo que coyó d’improvisu a munchos opositores, que nun terminaron de facer los cursos p’algamar los méritos a tiempu. Señalóse tamién que’l profesoráu que tien la certificación oficial en llingua asturiana, nun va poder incluyila nesta oposición, porque nun se llexisló nada en tal sentíu. Recordóse que, davezu, Asturies nun aceptaba como méritos cursos de llingua asturiana que, paradóxicamente, sí yeren aceptaos n’otres comunidaes autónomes.
En relación a la llingua asturiana y gallego-asturianu, SUATEA recordó que se tán dando los pasos para llograr la cooficialidá. Aportunamos en que, hasta agora, Asturies vivía una situación d’anormalidá constitucional, por nun reconocese la oficialidá de les sos llingües y que, al final, va solucionase, magar que va facese cola oposición de quien, autoproclamándose constitucionalistes, son contrarios a la Constitución nesti puntu, como tamién lo son n’otros. Col agravante de que los mesmos que se nieguen a reconocer la oficialidá  defenden la del gallegu, el catalán o l’euskera, lo qu’amás ta torgando que s’apruebe la especialidá docente d’asturianu, que dexa en situación d’eterna precariedá a esti profesoráu, que nun puede nin presentase a oposiciones. Tamién se ta torgando que l’alumnáu de dellos centros vea negáu’l so derechu, como asocede nel CP Santiago Apóstol de Mieres.
Por tolo anterior, SUATEA llama a participar na manifestación pola oficialidá de les nuestres llingües, que va tener llugar esti sábadu a les 12 n’Uviéu, y a movilizase para la fuelga que se va convocar pal día 28, por cuenta de la estabilización del profesoráu interino.

El Secretariado de SUATEA
N’ Úviéu, 11 d’ochobre de 2021

Print Friendly, PDF & Email

Esta entrada está disponible en: Castellano (Castellanu)

Hai un profesoráu al pie del cañón, pero ensín empleu estable

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757