Reunión de la Xunta de Personal Docente cola Conseyería d’Educación

Énte’l refugu sindical y la convocatoria de movilizaciones, l’Alministración arrenuncia a imponer al profesoráu interín les axudicaciones “a palpu”

Esti ye un resume breve de los temes trataos:

– Calendariu d’axudicaciones pal cursu 14-15 y nuevu sistema de pidimientu.
L’alministración DA MARCHA TRAS na so propuesta de pidimientu a palpu énte’l refugu del profesoráu y los sindicatos. Recordemos que SUATEA plantegó la convocatoria de movilizaciones si la conseyería siguía alantre. REPITIMOS LA NUESA PROPUESTA DE MEYORA DE PUESTU (ver documentu) que va estudiase pal otru cursu.

– Llantamientu de la LOMCE n’Asturies.
SUATEA pidió que nun entrara a valir la FP Básica, al entender que nun se ta en condiciones pa ello. Amás, nel casu de Primaria pide la eliminación del horariu d’enseñanza de les relixones o’l so amenorgamientu al mínimu llegal posible na nuestra comunidá, al tiempu que reclamó l’aumentu del horariu destináu a Llingua Asturiana y Gallego-asturianu. Va dase a conocer el borrador de curriculum de primaria esta mesma selmana, cola espresión del horariu destináu a cada cursu. Tamién se pidió la non realización de la prueba correspondiente a 3º de primaria, yá que ye potestá de la Conseyería la so realización.

– Información sobre la situación de les enseñances billingües pal cursu 14/15.
Depués d’una llarga esplicación de la Directora Xeneral, l’Alministración repite la so intención de facer sumir la “7ª hora” pal alumnáu qu’empiece 1º d’ESO nel programa billingüe pesie al refugu del colectivu.

N’entrando perriba nel tema de les oposiciones y n’acabando la reunión confírmase que’l miércoles 28 va publicase’l llistáu de persones almitíes y escluyíes y les pruebes van empezar el 20 de xunu.

N’otru orde de coses, dende SUATEA repitimos la nuestra esmolición pola situación xenerada en Cangas cola dimisión d’un equipu directivu y la propuesta de reestructuración d’espacios docentes públicos que lu xeneró. Tamién mos interesemos pola forma de provisión de puestos pal Conservatorio Superior pal próximu cursu, nel que va haber un nuevu equipu directivu que va tomar posesión en xunetu.